Partia Demokratike ka denoncuar situatën me mbetjet në qytetin e Kavajës dhe të Durrësit.
Andi Lila pjesë e Partisë Demokratike, në një komunikim për mediat është shprehur se situata e mbetjeve në Kavajë është kthyer në një bombë mjedisore që po rrezikon shëndetin e qytetarëve.
Ai thekson se Kavaja dhe Durrësi po preken nga një skemë kriminale, ndërsa hedh akuza ndaj kryeministrit Edi Rama që sipas Lilës synon të pasurojë vetëm klientelën e tij.
PD i kërkon SPAK të ndërhyjë urgjentisht për të parandaluar pasojat për ambientin dhe shëndetin e qytetarëve.
Deklarata e plotë:
Situata e mbetjeve në Kavajë është kthyer në një bombë mjedisore që rrezikojnë shëndetin e qytetarëve. Pamjet që shohim, që shoqërojnë përditshmërinë e qytetarëve dhe turistëve, nuk janë vetëm produkt i paaftësisë së pushteti vendor dhe i qeverisë.
Fatkeqësisht, ajo që qytetarët e Kavajës dhe Durrësit po përjetojnë është një skemë kriminale që po ndërtohet duke dëmtuar shëndetin e qytetarëve me qëllim pasurimin e klientëve të Edi Ramës.
Për të çuar para te mafia e inceneratorëve, plehrat po lihen me qëllim jashtë kontrollit, për të nxitur një krizë dhe pastaj për të ofruar një zgjedhje nga ata që e prodhuan këtë krizë.
Pra duke kërcënuar shëndetin e qytetarëve, po i detyrojnë të pranojnë një zgjedhje shumë më të shtrenjtë për menaxhimin e plehrave.
Kjo lojë me shëndetin e qytetarëve, vetëm për përfitimet e mafies së inceneratorëve, është e papranueshme dhe kriminale.
Ne i kërkojmë SPAK-ut të veprojë urgjentisht, përpara se pasojat për ambientin dhe shëndetin e njerëzve të jenë të parikuperushme./abcnews.al/
