Ministri i Jashtëm rus Sergej Lavrov do të vizitojë Turqinë të mërkurën (8 qershor) për bisedime, duke përfshirë krijimin e një korridori të Detit të Zi për të lejuar drithin ukrainas të hyjë në tregjet botërore ndërsa çmimet globale të ushqimeve rriten.
Bisedimet vijnë pasi Ankaraja përballet me presion për të hapur Detin e Zi për anijet e NATO-s për të thyer bllokadën e Rusisë ndaj Ukrainës.
Vizita e Lavrov vjen pas anulimit të vizitës së tij në Serbi 2 ditë më parë për shkak të mbylljes së hapësirës ajrore.
Turqia ka ofruar të përcjellë autokolona detare nga portet e Detit të Zi të Ukrainës, të cilat janë bllokuar nga ofensiva e Moskës.
Ukraina dhe shumë qeveri perëndimore kanë akuzuar Rusinë, e cila ka thënë se do ta lejonte Ukrainën të rifillonte eksportet e saj të drithërave përmes detit nëse Perëndimi heq disa sanksione të vendosura ndaj saj për fillimin e luftës.
Rusia ka kapur pjesë të mëdha të bregdetit të Ukrainës që nga fillimi i pushtimit të saj më 24 shkurt, dhe luftanijet e saj kontrollojnë Detin e Zi dhe Detin Azov.
Presidenti rus Vladimir Putin javën e kaluar i tha presidentit turk Rexhep Tajip Erdogan se Moska ishte gati të punonte me Ankaranë për të çliruar transportin detar.
Zëdhënësi i Kremlinit Dmitry Peskov më 7 qershor u tha gazetarëve se Ukraina ende kishte nevojë të çminonte bregdetin e saj në mënyrë që të realizohej eksporti i grurit.
“Kjo do t’i lejojë anijet, pasi të kontrollohen nga ushtria jonë për t’u siguruar që nuk mbajnë armë, të hyjnë në porte, të ngarkojnë grurë dhe me ndihmën tonë, të shkojnë në ujërat ndërkombëtare,” tha ai.
Presidenti i Këshillit Evropian Charles Michel më 6 qershor akuzoi Rusinë për përdorimin e furnizimeve ushqimore si “një raketë vjedhurazi kundër vendeve në zhvillim” dhe fajësoi drejtpërdrejt Moskën për krizën e afërt globale të ushqimit, duke bërë që ambasadori i Moskës në OKB të largohej nga një takim i Këshillit të Sigurimit.
Me fjalët drejtuar drejtpërdrejt Valery Nebenzya-s, Michel tha se kohët e fundit ai pa miliona tonë drithë dhe grurë të ngecur në kontejnerë dhe anije në portin ukrainas të Odesa-s “për shkak të anijeve luftarake ruse në Detin e Zi”.
Ai shtoi se bombardimet e Rusisë ndaj instalimeve kyçe të infrastrukturës po pengonin mbjelljen dhe korrjen e grurit.
Ministri rus i Mbrojtjes Sergei Shoigu tha se dy portet kryesore ukrainase në detin Azov të pushtuara nga forcat rusem Berdyansk dhe Mariupol, ishin gati të rifillonin dërgesat e grurit, por shtoi se Kievi ende duhet të çminojë afrimet në portet e tij që të realizohen eksportet .
Porti kryesor i Ukrainës, Odesa, mbetet i bllokuar, raporton REL.
Ofensiva e Rusisë në Ukrainë ka ndërprerë furnizimet me grurë dhe mallra të tjera nga të dy vendet, duke shkaktuar shqetësime për rrezikun e mungesës së ushqimit dhe urisë në mbarë botën./abcnews.al/
