Orkestra Simfonike e Shkodrës u rikthye në skenën e Teatrit “Migjeni” me një koncert madhështor.
Nën dirigjimin e maestro Jetmir Barbullushit u ngjiten ne skene veprat e kompozitorëve shkodranë që kanë lënë gjurmë në muzikën shqiptare.
I pranishëm në koncert ishte edhe Maestro Zhani Ciko i cili vlerësoi lart interpretimin e veprave. Ai u shpreh se skenës shqiptare i mungon muzika serioze dhe ky rithemelim i orkestrës simfonike të Shkodrës është një ngjarje e madhe për artin muzikor shqiptar.
“Një koncert ku s’di ç’të vlerësoj më parë., muzika e shkëlqyer, interpretuesit jashtëzakonisht të mirë me një pasion të madh dhe mbi të gjitha një publik i shkëlqyer, ky është një triumf i Shkodrës”, është shprehur dirigjenti Zhani Ciko.
51 instrumentist dhe 12 solist morën pjesë në këtë koncert të parë të orkestrës. Ata nuk mundën dot ti fshihnin emocionet e tyre për këtë dalje në skenë
“Kam qenë pjesë e festivalit të fëmijëve ku më ka dirigjuar i madhi preng Jakova dhe sot kthehem pas 55 vitesh”, ka thënë soprano, Alberta Kaçaj.
“Është një gjë e mrekullueshme, ajo që ka rëndësi është se u prit mirë edhe nga publiku” , është shprehur bariotoni Armando Likaj.
“Unë me lot në sy por edhe publiku, për të përjetuar këtë moment”.
Dirigjenti i orkestrës Jetmir Barbullushi u shpreh se kjo është një punë e jashtëzakonshme.
“Jam shumë i kënaqur sot që kam një brez të ri muzikantësh, krahas pedagogëve dhe pjesës tjetër që të ruajmë traditën që kemi pasur”, ka thënë ai.
Koncerti i orkestrës simfonike të Shkodrës ishte edhe një homazh për veprat e pavdekshme të kompozitorëve shkodranë si Prenkë Jakova, Çesk Zadeja, Avni Mula dhe shumë të tjerë./abcnews.al
