I mituri doli nga spitali sot në provincën jugore të Hatay-it pas 15 ditësh trajtim. Ai u shtrua me simptoma të etheve dhe kollë në Spitalin Universitar për Kërkim dhe Trajnim Mustafa Kemal në Hatay, shkruan Daily Sabah.
Dr. Çiğdem El në Departamentin e Shëndetit dhe Sëmundjeve të Fëmijëve për AA tha se “Turqia është një shembull për botën me masat dhe studimet e saj për të frenuar COVID-19”.
El, pa zbuluar identitetin e të mbijetuarit, tha se vogëlushi “fillimisht ka pasur probleme me frymëmarrjen”.
“Pacienti ynë i ri fillimisht kishte probleme me frymëmarrjen. Kishte nevojë për një respirator për tri ditë, por iu përgjigj trajtimeve tona shumë shpejt”, tha El.
Ajo më tej shtoi se familjarët e pacientit të ri kanë rezultuar negativë për koronavirusin. Spitali do të vazhdojë monitorimin e fëmijës për katër javë, tha El. Ndërkohë, familja është shprehur e lumtur që takoi fëmijën e tyre për herë të parë pas trajtimit 15-ditor.
“U mërzitëm shumë pasi testet e tij për COVID-19 dolën pozitive. Fatmirësisht, fëmija ynë tani është i shëndetshëm. Ne po ashtu kemi marrë trajnime për masat kundër virusit”, tha babai i vogëlushit.
Deri më tani Turqia, ka regjistruar afër 91.000 raste me koronavirus, ndërsa numri i të vdekurve aktualisht është 2.100. Më shumë se 13.400 persona janë shëruar ndërsa 1.909 persona janë duke marrë trajtim në njësitë e kujdesit intensiv./abcnews.al
