Partizani dhe Teuta janë ndarë në paqe, por në fushë përballja mes tyre ka qenë një betejë e vërtetë. Takimi u mbyll 1-1 dhe shënues të golave ishin Avdyli dhe Trashi, me këtë të fundit që realizoi me një silurë nga goditja e dënimit. Durrsakët humbin mundësinë për të siguruar tre pikët e radhës, edhe pse barazimi i Falmurtarit përballë Tiranës i mban në krye bashkë me Skënderbeun.
NDESHJA – Fraksioni i parë i lojës ishte i barabartë dhe mjaft i luftuar. Partizani ishte më kërkues, por Teuta pati rastin e parë të rrezikshëm me Nikac. Më pas Solomon iu afrua golit për Partizanin, për të ardhur më pas edhe te tentativa nga distanca e Asanit, që vuri në provë portierin Frashëri.
Minuta e 35-të ishte pikë kyçe e ndeshje, pasi Romero u ndëshkua me kartonin e dytë të verdhë pas një ndërhyrje në mesfushë. Protesta të shumta te arbitri Hamiti, por vendimi ishte marrë. Dy minuta më pas Avdyli zhbllokoi ndeshjen dhe Teuta shpërtheu në festë.
Ndeshja ishte e tensionuar, pasi nuk munguan ndërhyrjet e ndaluara. Partizani kërkoi kartonin e dytë të verdhë për Lorenco Vilën, por arriti nuk mendoi ashtu. Vonesat e lojës ishin disa dhe u akorduan tre minuta shtesë. Në të fundit Trashi ekzekutoi mjeshtërisht një goditje dënimi, që u devijua nga portieri Frashëri dhe përfundoi në rrjetë. 1-1 dhe skuadrat iu drejtuan dhomave të zhveshjes.
Pjesa e dytë u shoqërua me ndryshime në fushë, por skuadrat u treguan të kujdesshme. Teuta, edhe pse me një lojtar më shumë, nuk është se e mori kontrollin e lojës dhe të të kërkonte me ngulm fitoren. Shkëmbi hodhi në fushë edhe Kallakun, për t’i dhënë më shumë fantazi lojës së skuadrës së tij. Partizani në të 78′ kishte një mundësi shënimi me Çinarin, por shkodrani nuk e dërgoi dot topin në rrjetë. Deri në fund rezultati nuk ndryshoi dhe skuadrat ndanë nga një pikë.
KATEGORIA SUPERIORE – JAVA 7
E shtunë, më 5 tetor, ora 17:00
PARTIZANI-TEUTA 1-1
Shënues: Trashi 45+3’/ Avdyli 37′
Partizani: Hoxha, Mala, Belica, Boldor, Trashi, Broja, Romero, Cordeiro (Bardhi 82′), Asani (Telushi 38′), Çinari, Solomon (Brown 60′). Trajner: Franco Lerda
Teuta: Frashëri, Vila (F. Beqja 46′) , Hoxha, Arapi, Kuro, Avdyli, Aleksi, Gashi (L. Beqja 76′), Çyrbja (Kallaku 56′), Khalid, Nikac Trajner: Bledi Shkëmbi
Kartonë të verdhë: Romero 13′, 35′, Cordeiro 65’/Aleksi 17′, Vila 33′, Arapi 68′, Avdyli 73′
Karton i kuq: Romero 35′ (2)
/abcnews.al
