Loading ...
Sezoni historik I kurorëzuar me fitimin e Champions League është vetëm një kujtim te Paris SG.
Vigjilja e sezonit të ri i gjen kampionët francezë të përçarë në dhomat e zhveshjes, në një atmosferë që mediat në vend e cilësojnë si një katastrofë.
Çështja “Donnarumma” dhe gara për “Topin e Artë” kanë prishur qetësinë në skuadrën e drejtuar nga Luis Enrike.
Pavarësisht se ishte një nga protagonistët e edicionit të fundit, portierit Italian I është treguar dera, duke u lënë jashtë ekipit për finalen e Superkupës së Europës, në program mbrëmjen e së mërkurës.
Shkak është bërë vendimi i Donnarumma për të mos rinovuar kontratën dhe një vit nga skadenca, te Paris SG nuk duan të jetojnë një tjetër situatë si ajo me Mbappe, që u largua drejt Real me parametra zero.
Një problem i madh, por jo në nivelin e mërive që kanë nisur të dalin në pah pas publikimit të listës së zgjeruar me 30 kandidatët për “Topin e Artë”, ku në garë janë tetë lojtarë parizienë.
Megjithëse jo zyrtarisht, klubi mbështet Ousmane Dembele, që në fakt shihet edhe mes favoritëve për trofeun.
Por lojtarë si Ashraf Hakimi nuk e kanë pritur mirë këtë gjë, ndërsa publikisht nuk i kanë fshehur ambiciet personale.
Duke qëndruar në atë që raportojnë mediat franceze, kjo ka sjellë një përplasje të heshtur dhe përçarje në dhomat e zhveshjes, në vigjilje të sezonit të ri, që nis me një finale të rëndësishme, siç është ajo kundër Tottenham për Superkupën e Europës. / abcnews.al /
