Arrestohet një 26 vjeçar, banues në Xhafzotaj pasi po planifikonte grabitjen e një pike karburanti në qytetin e Durrësit. Në kërkim janë shpallur edhe dy persona të tjerë, të dyshuar pjesë e grupit që merrej me grabitje. Ata janë një 22 vjeçar nga Delvina me inicialet XH.M dhe një 21 vjecar nga Tirana, me inicialet A.C, të cilët arritën t’i shpëtonin policisë.
Sipas informacionit të policisë, të tre në bashkëpunim me njëri tjetrin kishin planifikuar të kryenin gjatë natës grabitjen e pikës së karburantit. Në momentin e arrestimit, policia i gjeti e sekuestroi 26 vjeçarit nga Xhafzotaj me inicialet J.M, një armë zjarri automatike kallashnikov model 56, një karikator me 22 fishekë, tre maska, tre palë doreza, tre celularë dhe një thikë, që do përdoreshin për të realizuar vjedhjen me armë të karburantit.
Njoftimi i Policisë
Seksioni i Hetimit të Krimeve në Komisariatin e Policisë Durrës , në bashkëpunim me shërbimet e Policisë së Rendit , në bazë të informacioneve policore të siguruara në rrugë operative se këta shtetas kishin planifikuar grabitjen me armë të një pike karburanti, kanë organizuar punë dhe si rezultat i përdorimit të metodave speciale të hetimit ka finalizuar me sukses operacionin e koduar “Ndjekja “.
Gjatë operacionit u bë e mundur kapja dhe arrestimi në flagrancë i autorit kryesor të dyshuar, shtetasit J.M., 26 vjeç, banues në Xhafzotaj, të cilit në momentin e arrestimit policia i gjeti dhe sekuestroi në cilësinë e provës materiale një armë zjarri automatike Kallashnikov model 56, një karikator me 22 fishekë, tre maska, tre palë doreza, tre aparatë celularë dhe një thikë , sende këto që do përdoreshin për të realizuar vjedhjen me armë të karburantit.
Gjithashtu u shpallen në kërkim shtetasit Xh.M.,22 vjeç, banues në Delvinë dhe A.C., 21 vjeç, banues në Tiranë, pasi në bashkëpunim me njëri -tjetrin dhe shtetasin e arrestuar në flagrancë më datë 30.03.2019 gjatë natës kishin planifikuar grabitjen e një pike karburanti në qytetin e Durrësit.
Vazhdon puna intensive për kapjen e dy autorëve të tjerë si dhe për të bërë të mundur dokumentimin e plotë ligjor të aktivitetit kriminal të këtyre shtetasve.
Materialet i kaluan Prokurorisë pranë Gjykatës së Shkallës së Parë Durrës në ngarkim të shtetasve të mesipërm për veprat penale “Vjedhje me armë e kryer në bashkëpunim e mbetur në tentativë” dhe “Mbajtja pa leje e armëve luftarake” , parashikuar në nenet 140,25,22 dhe 278/1 të Kodit Penal. /abcnews.al
