“Parakontratat mungesë respekti”, Daja: Duan të më mbyllin gojën, s’luftojmë me mullinjtë e erës

schedule09:37 - 25 Maj, 2021

schedule 09:37 - 25 Maj, 2021

Ilir Daja doli sot në konferencë për mediet para ndeshjes me Bylisin, e fundit për këtë sezon në Superiore. Trajneri i Partizanit flet sërish për arbitrimin dhe ankohet për tendencë në dëm të të kuqve. Konfirmon mungesat e shumta për nesër dhe nuk premton rezistencë heroike ndaj Bylisit. Trajneri ka edhe një kunj për Çinarin, i cili ka marrëveshje me Samsunspor në Turqi.

“Në mënyrë permanente jemi goditur dhe kur po nisesha në konferencë për shtyp më erdhën vendimet e Komisionit të Disiplinës, që kishin ardhur në e-mailin tim privat. Si duket kanë menduar t’ia çojmë njëherë trajnerit, që të mos hapi gojën (në konferencë). Nuk është rast i izoluar sepse të ishte, do ishte normale sepse jemi njerëz.

Por ka qenë në vazhdimësi dhe ndaj Vllaznisë ishte e fundit, për të na nxjerrë jashtë gare. Kam dëgjuar opinionistët e Vllaznisë dhe dua të sqaroj se në këtë çështje nuk ka lidhje Vllaznia, nuk e dhanë ata penalltinë. Kanë bërë një kampionat të mirë dhe janë meritë aty ku janë. Nuk ka pse të analizojnë problemet e tjera sepse nesër do i ndodhë Vllaznisë, a ndonjë ekipi tjetër.

 

Më ka ndodhur në dy raste në karrierën time, kur kam dorëzuar titullin në dy ndeshje nga fundi. Ka qenë Jorgji në ato raste, por nuk ka të bëjë me të, sepse nëse do ishte ai, do ishte një Jorgj tjetër. Në 4 ndeshjet e fundit, në 3 na ka gjykuar Hamiti. Në gjithë kampionatin Partizani nuk ka fituar asnjëherë nën gjykimin e Hamitit. Më pas me Ferhatin e me shokë, që e pamë se ç’donin të bënin.

Mendoj se nëse nuk e kishin bërë këtë javë, java e fundit në Ballsh do kishte qenë skëterrë në paragjykimin tim. Kemi shumë mungesa për nesër. Asani është dëmtuar në stërvitjen e parafundit, është Junior dhe Belica e Broja me kartonë. Është në pikëpyetje edhe një tjetër lojtar, për të cilin do marrim përgjigje në vijim. Do shkojmë të bëjmë ndeshjen me Bylisin. Nuk do luftojmë me mullinjtë e erës sepse gjithçka mendoj se është e mbyllur.

Do respektojmë kampionatin dhe punën e bërë me kontigjentin që kemi dhe t’i tregojmë se Partizani nuk ka pasur asnjë aleat në këtë kampionat, por do bëjmë më të mirën me mundësitë që kemi. Duam maksimumin në këtë ndeshje. Fjalët e mia për gjykimin janë për të çuar në vendin e duhur meritën dhe arbitrat të mos jenë pjesë e paragjykimeve.

 

Nuk flas se dha një penallti në fraksion sekonde, por është skandaloze që arbitri kryesor është 7 metra nga Belica dhe gjithçka e sheh ai, por merr mendimin e anësorit dhe fundorit, që nuk shihnin asgjë. Nuk ka ndodhur vetëm me Vllazninë, janë edhe shumë gola të rregullt të mohuar, sidomos në fazën e fundit. Kjo nuk është një vendim i momentit, por një vazhdë e gjithë kampionatit.

Luftuam deri në javën e parafundit, nuk na lanë të luftojmë edhe këtë javë. Nëse pretendojmë këtë javë titullin kampion është utopi, nëse nuk na lanë deri më tani, nuk do bëjnë në ndeshjen e fundit. Nuk po them se s’do shkojmë për të fituar në Ballsh, por them se titulli është çështje e mbyllur.

Kemi nisur të mendojmë për Europën sepse janë shumë lojtarë në fund të kontratave. Disa prej tyre, siç e ka konfirmuar shtypi kanë firmosur edhe parakontrata, diçka që e lejon edhe FIFA, por në etikën morale kjo nuk shkon sepse Partizani i ka mbështetur në të gjitha drejtimet”, u shpreh Daja.