E ardhmja e mesfushorit të Milanit, Lucas Paqueta, është sërish në dyshim. Braziliani është lënë jashtë listës së lojtarëve të grumbulluar nga tekniku Pioli për duelin ndaj Shamrock në ndeshjen e vlefshme për raundin kualifikues të Europa League.
Në listën e 20 lojtarëve mungojnë dhe Ante Rebic dhe Raphael Leao dhe sipas raportimit të “MilanNews” lënia jashtë e Paquetas nuk është për shkak të ndonjë dëmtimi. Ky vendim i Piolit është një sinjal i qartë për lojtarin, i cili do të vazhdojë stërvitjen ditën e nesërme në Milanello me pjesën e mbetur të skuadrës.
Mesa duket Paqueta nuk është në planet e italianit dhe mund të vendoset sërish në merkato nga klubi kuqezi, ku është klubi i Lyon që ka shfaqur interesim për shërbimet e tij. Kujtojmë që ishte Fiorentina që e kërkonte fantazistin, por marrëveshja nuk u arrit mes klubeve. /abcnews.al
