Përfaqësuesi i OSBE-së për Lirinë e Medias deklaron se qeveria duhet t’i bëjë ndryshime të tjera ligjit për median. Në një intervistë për Zërin e Amerikës Harlem Desir tha se qeveria duhet të mbrojë lirinë e shtypit aq më tepër tani që vendi po kalon situata të acaruara politike.
“Ne mendojmë se është shumë e rëndësishme për Shqipërinë që të mbrojë lirinë e shtypit dhe të shmangë në të ardhmen kufizimin e lirisë së shprehjes për mediat on-line. Projekt-ligji aktual u jep shumë kompetenca agjencive rregulluese AMA ose AKEP që janë mbikëqyrës të sistemit të transmetimeve. Ato nuk duhet të marrin rolin e gjykatësit për rastet e shpifjeve për shembull, ose për raste të tjera që u takojnë gjykatave t’i zgjidhin”.
Edhe po të ketë kriza politike, siç ndodh në shumë vende, thotë ai, shtypi duhet të jetë i lirë të bëjë punën e tij./ABC News Albania 24/7
