Është mbledhur pasditen e së martës Konferenca e Kryetarëve ku po diskutohet për zgjedhjen e kreun të ri të shtetit. Opozita dhe mazhoranca nuk po gjejnë ende një gjuhë të përbashkët ndërsa ka mbetur ende edhe një raund që kërkon shumicë të cilësuar për zgjedhjen e pasuesit të Ilir Metës.
Deputetja demokrate Grida Duma akuzoi mazhorancën se qëllimi i saj nuk është të ndjekë një proces që mund të nxjerrë një president konsensual, por thjesht po kërkon ta përfshijë opozitën në atë që e cilësoi si farsë. Po ashtu, Duma propozoi që opozita të mos jetë më prezente në seancat e ardhshme.
“Deri më 30 PS nuk do të propozojë. Ju thoni që deri më 30, ne nuk propozojmë asgjë. Pra deri me 30, nuk do të propozoni. PS nuk e përjashton njeri nga procesi. Pra të treja raundet i bëni kot. Ne duhet të marrim një vendim që të mos vijmë më fare. Sepse duket që këtu nuk bëhet fare fjalë për një proces që nxjerr një president konsensual. Nëse ju nuk përfshiheni, si do të dalë Presidenti? Ju po kërkoni nga opozita që të marrë pjesë si farsë.”
Nga ana tjetër, Elisa Spiropali i kujtoi opozitës se nuk po angazhohet dhe se nuk po sjell formalisht një listë me kandidatë. Sipas saj, shumica është e gatshme për të folur për emra, për të mbështetur një nga kandidatët, por kushte nuk pranon.
“Ne sot kemi vetëm një listë kriteresh dhe nuk kemi as emra dhe as angazhim për të marrë pjesë në proces. Nuk e di a ka ndodnjë forcë politike që është shumicë që të pranojë të përjashtohet nga një proces i tillë. Nëse ne s’jemi legjitim, pse uleni këtu me ne? Pse vini në Parlament? Ne kemi qenë që ditën e parë të gatshëm për të folur për emra. Edhe takimin që patëm me Alibeajn, kemi rënë dakord pikë më pikë për këtë që po themi. Jemi të gatshëm për të folur për emra, kushte nuk vëmë, kushte nuk na vini. Nuk kemi një qëndrim zyrtar nga ju. Nëse doni, eja të ulemi dhe diskutojmë. Pastaj, firma, votë dhe mbështetje. Jemi të gatshëm të mbështesim një kandidat që të mbështesim një kandidat që plotëson kriteret. Nëse është problem i brendshëm i opozitës se kujt i mbetet faji që po flet me armikun, s’ju ndihmojmë dot…”
Ndërkohë, u vendos që më 30 maj do të jetë raundi i tretë i procesit të votimit të Presidentit të Republikës. Afati i dorëzimit të dokumentacionit të kandidateve, është të dielën, më datë 29, ora 16:00. /abcnews.al/
