Spanja do të angazhojë një “flotë” robotësh të cilët mund të bëjnë 80,000 teste për koronavirusin në ditë. Vendi është aktualisht i dytë më i prekur në Evropë nga koronavirusi ndërsa në vendin e parë mbetet Italia me 59,138 raste të konfirmuara dhe 5,476 viktima.
Sa i përket Spanjës, numri i të infektuarve ka shkuar në 29,909 nga të cilët 1,141 janë konfirmuar vetëm ditën e sotme. Nga numri total i viktimave, 41 e kanë humbur jetën vetëm 24 orët e fundit.
Tashmë, për të mbajtur situatën nën kontroll, autoritetet spanjolle besojnë se testimi në masë mund të jetë një mënyrë efikase. Deri më tani, autoritetet e shëndetit në vend bëjnë mes 15,000 dhe 20,000 teste.
Duke folur në një konferencë të shtunën, drejtuesja e Institutit Spanjoll të Shëndetit Raquel Yotti u shpreh:
“Një plan për të automatizuar testet përmes robotëve është tashmë i krijuar dhe Spanja është zotuar që të blejë 4 robotë që mund të ekzekutojnë 80,000 teste në ditë.”
Nuk dihet ende sesi ekzaktësisht do të operojnë këta robotë. /abcnews.al/
