Loading ...
Mushkonjat janë shfaqur për herë të parë në Islandë pasi ngrohja globale po e bën vendin më të banueshëm për insektet, shkruan The Guardian.
Islanda ishte një nga vendet e përveçme në botë që nuk kishte mushkonja. Tjetri është Antarktida.
Shkencëtarët kishin parashikuar prej kohësh se mushkonjat mund të mbërrinin në Islandë pasi ka mjaft habitate që favorizojnë shumimin e tyre si moçalet dhe pellgjet. Megjithatë, shumë lloje të tyre mund të mos mbijetonin dot në klimën e ashpër.
Por Islanda po ngrohet, katër herë më shpejt sesa pjesa tjetër e hemisferës veriore. Akullnajat po shkrijnë dhe në ujërat e saj po gjenden peshq që vijnë nga vende më të ngrohta, me klimë jugore.
Ngrohja e planetit ka bërë që të shfaqen më shumë lloje mushkonjash. Në Mbretërinë e Bashkuar, këtë vit u gjetën vezë të mushkonjës egjiptiane (Aedes aegypti), në Kent u gjet mushkonja tigër (Aedes albopictus). Këto janë lloje që mund të përhapin sëmundje tropikale si virusi chikungunya dhe Zika.
Matthías Alfreðsson, një entomolog në Institutin e Shkencave Natyrore në Islandë, e konfirmoi praninë e mushkonjave pasi i identifikoi vetë mostrat që i kishte dërguar një i apasionuar pas shkencës,
Ai tha se ishin tri prej tyre, dy femra dhe një mashkull, që i përkasin llojit Culiseta annulata. Kjo specie i reziston të ftohtit dhe mund të mbijetojë në Islandë duke gjetur strehë në bodrume dhe stalla.
