Nga Erblina Mile
Jepet përsëri me koncesion terminali i kontejnerëve në Portin e Durrësit i cili merret me shkarkim –ngarkimin e mallrave.
Agjencia e Prokurimit Publik ka publikuar se fitues i “shërbimit të menaxhimit dhe operimit të terminalit të kontejnerëve në portin e Durrësit është kompania “Hili Company Limited” e cila do të menaxhojë terminalin në portin më të madh të vendit tonë deri në vitin 2026.
Kompania fituese ka qenë e vetmja në garë dhe është me seli në Maltë, ndërsa vlera e investimi është rreth 30 milionë euro.
Shërbimi i përpunimit të kontejnerëve në Durrës më herët ofrohej nga kompania “Kurum”e cila e kishte marrë këtë shërbim për një afat 35 vjeçar.
Por Ministria e Transporteve iu drejtua gjykatës për prishjen e kontratës me pretendimin se koncensionari nuk kishte përmbushur kushtet e kontratës dhe vendimi i marrë ka qenë në favor të autoriteteve shqiptare, ndërsa ekzekutimi i këtij vendimi është bërë në muajin janar 2020 nga përmbarimi.
Pas këtij vendimi në shtator të vitit të kaluar konsorciumi Kurum depozitoi një ankesë pranë në Qendrës Ndërkombëtare për Zgjidhjen e Mosmarrëveshjes së Investimeve duke kërkuar dëmshpërblim prej 100 milionë euro nga ekzekutivi shqiptar, për shkak të prishjes së një anshme të kontratës koncesionare.
Por pavarësisht se terminali i kontejnerëve u dha me koncesion qeveria tashmë ka nënshkruar një marrëveshje me Emiratet e Bashkuara Arabe për transformimin e Portit të Durrësit në port turistik ndërsa Porti tregtar ku përpunohen mallrat parashikohet të do zhvendoset në zonën e Porto Romanos.
Kompania e Emirateve të Bashkuara, Emar, synon investimin e një shume me vlerë 2 miliardë euro për ngritjen e infrastrukturës së re të portit.
/abcnews.al/
