Kryeministri i Izraelit Benjamin Netanyahu dhe lideri i opozitës Benny Gantz kanë rënë dakord të formojnë një qeveri emergjente.
Do të ngrihet gjithashtu një “kabinet lufte”, me Netanyahun, Gantz dhe ministrin e mbrojtjes të vendit.
Kjo do të thotë se gjatë periudhës së luftës, “nuk do të promovohet asnjë projektligj apo vendim i qeverisë që nuk ka të bëjë me zhvillimin e luftës” dhe të gjitha emërimet e larta do të zgjaten automatikisht gjatë periudhës së luftës.
Pas sulmit tronditës nga Hamasi gjatë fundjavës dhe përgatitjeve në Izrael për të menaxhuar një luftë të zgjatur, disa nga partitë e qendrës së majtë të Izraelit kanë ofruar t’i bashkohen qeverisë së Netanyahut.
Ideja për formimin e një qeverie emergjente u bisedua që të shtunën, por mosmarrëveshjet janë shfaqur për kundërshtimin e opozitës ndaj ministrit ekstremist të Sigurisë Kombëtare Itamar Ben Gvir, të cilin ajo e akuzon për ndezjen e situatës. /abcnews.al
