Ish-Presidenti Hashim Thaçi pret të martën një tjetër vendim nga Haga. Kësaj here për akuzën e pengimit të drejtësisë. Mbrojtja e ish-presidentit i cilëson pretendimet e prokurorisë të paprovuara dhe juridikisht të gabuara. Gjykatësi Christopher Gosnell ka caktuar shpalljen e vendimit për 17 nëntor, në orën 10:00, duke urdhëruar paraqitjen e të pesë të akuzuarve. Krahas ish-presidentit, vendimin do ta dëgjojnë ish-drejtori i AKI-së, Bashkim Smakaj, ish-kryetari i komunës së Malishevës, Isni Kilaj, ish-ministri Hajredin Kuçi dhe Fadil Fazliu.
Në qendër të përplasjes mes palëve janë bisedat e regjistruara gjatë vizitave në paraburgim: çfarë është thënë, kush ka folur dhe çfarë provojnë ato. Prokuroria i interpreton këto materiale si dëshmi të përpjekjeve për ndërhyrje te dëshmitarët. Avokatët e Thaçit kundërshtojnë si interpretimin, ashtu edhe besueshmërinë e transkripteve.
Në parashtrimin përfundimtar, mbrojtja pretendon se hetimet nuk siguruan prova për kontakte të papërshtatshme me dëshmitarët në emër të ish-presidentit. Sipas avokatëve, pjesë të bisedave ishin të pakuptueshme, ndërsa transkriptimi nga personeli i Prokurorisë rrezikonte të ndikohej nga pritshmëritë e vetë hetuesve. Mbrojtja kundërshton edhe trajtimin si konfidencial të informacioneve që, sipas saj, njiheshin publikisht ose përbënin kujtime të përbashkëta të Thaçit me vizitorët.
Avokatët argumentojnë gjithashtu se dispozitat penale janë interpretuar përtej kuptimit që kanë në praktikën gjyqësore të Kosovës. Këto mbeten argumente të mbrojtjes, ende pa vlerësimin përfundimtar gjyqësor. Një nga dëshmitaret më të forta të mbrojtjes ishte ekspertja Helen Fraser. Ajo vlerësoi se besueshmëria e transkripteve ishte e ulët dhe pranoi kufizimet që vinin nga mosnjohja e gjuhës shqipe.
Kritika e saj lidhej me metodën e përdorur dhe mungesën e garancive të mjaftueshme për saktësinë e materialit të paraqitur. Prokuroria e kundërshton këtë vlerësim. Në fjalën përmbyllëse, prokurori Joshua Hafetz përmendi rreth 28 orë biseda të regjistruara gjatë nëntë vizitave, të shpërndara përgjatë katër muajve.
Akuza e dytë ndaj Hashim Thaçit, për pengim të drejtësisë, u dorëzua fillimisht në Gjykatën Speciale më 15 dhjetor 2023, ndërsa gjyqi zyrtarisht nisi më 27 shkurt 2026.


