Loading ...
Greqia ka kaluar një 24-orësh jashtëzakonisht të vështirë për shkak të motit të keq “Erminio”, i cili goditi shumë zona të vendit me ashpërsi të veçantë. Përveç pellgut të Atikës i cili u prek rëndë, ishuj si Rodosi , Porosi dhe Sikinos përjetuan pasojat intensive të motit të keq i cili shkaktoi shira të rrëmbyeshëm dhe përmbytje.
Ishulli i Rodosit u godit nga erëra të stuhishme jugore që arrinin deri në 110 kilometra në orë. Në të njëjtën kohë, siç raportoi ERT, valët në port tejkaluan 3 metrat. Ujërat e rrëmbyeshme përmbytën Njësitë Bashkiake të Embonës dhe Mandrikos, ndërsa në shumë zona u rrëzuan pemë dhe u regjistruan dëme materiale.
Nisur nga situata e rënduar mbrëmjen e së mërkurës deri sot u është kërkuar banorëve të Rodosit të kufizojnë lëvizjet e tyre.
Në aeroportin “Diagoras”, erërat e forta shkaktuan anulimin e dhjetëra fluturimeve, me të paktën 10 avionë çarter që ndryshuan kurs dhe u drejtuan drejt destinacioneve të tjera, si Kos dhe Antalya në Turqi. Në të njëjtën kohë, anijet mbetën të bllokuara për shkak të erërave të rrezikshme.
Me vendim të guvernatorit rajonal të Egjeut Jugor, Giorgos Hadjimarkos, funksionimi i të gjitha njësive shkollore, të të gjitha niveleve arsimore , në të gjithë territorin e Cikladeve dhe Dodekanezëve u pezullua për të enjten, më 2 prill, për mbrojtjen parandaluese të sigurisë publike.
Edhe në Poros situata nga moti ishte jashtëzakonisht i vështirë. U regjistruan përmbytje në zonë, ndërsa dy automjete u rrëmbyen nga ujërat e rrëmbyeshme.
Një urë e vogël u shemb, ndërsa në zonën e Askelit, makinat u përmbytën në det . Departamenti i Zjarrfikësve kreu një operacion për të nxjerrë dy të moshuar, si dhe për të nxjerrë ujin nga shtëpitë e përmbytura.
Në Sikinos, bodrumet dhe rrugët pranë portit u përmbytën, ndërsa imazhe të ngjashme u regjistruan në zona të tjera të Egjeut, si Hidra dhe Kimolos.
Valët arritën në strukturën urbane, duke shkaktuar dëme në zonat bregdetare dhe ndërprerje serioze të jetës së përditshme të banorëve. Sipas kosnews24.gr, moti i keq intensiv shkaktoi edhe fundosjen e një anijeje në portin e Kosit.
