MSH: Ceremonitë burim i përhapjes së infeksionit, vendosni maskë edhe në ambiente të hapura

Gjatë informimit mbi situatën epidemiologjike në vend, Ministria e Shëndetësisë ka njoftuar qytetarët të shmangin ceremonitë e çdo lloji, pasi janë burim i përhapjes së infeksionit.

“Vendosni detyrimisht maskën në çdo ambient të mbyllur dhe kudo ku nuk është e mundur mbajtja e distancës, vendosni maskë apo barrierë mbrojtëse edhe në ambientet e hapura. Shmangni grumbullimet masive, ceremonitë e çdo lloji, pasi janë burim i përhapjes së infeksionit”, njofton ministria.

Ndërkohë, situata në spitale vijon të  jetë thuajse e njëjtë, me 117 persona të shtruar, 16 në terapi intensive, 5 prej të cilëve të intubuar.

Në 24 orët e fundit, 2 qytetarë humbën jetën nga Covid dhe u regjistruan 119 raste të reja./abcnews.al