Loading ...Ka disa histori artistësh që nuk mbyllen me largimin nga skena. Ato thjesht marrin një tjetër drejtim. E tillë është historia e Mira Bregut, artistes që dikur ngjitej në skenat e festivaleve shqiptare, ndërsa sot jeton mes muzikës, familjes dhe botës së diplomacisë në Gjenevë.
Prej shtatë vitesh, Gjeneva është kthyer në shtëpinë e saj, ku jeton dhe punon, pasi u largua nga Shqipëria bashkë me dy fëmijët. Por largimi nuk e zbehu kurrë lidhjen me vendin e saj.
Përkundrazi, muzika mbeti ura që e lidh ende me Shqipërinë, kujtimet dhe vitet e bukura të skenës.
Mira rikthehet sa herë mundet në Tiranë, veçanërisht pranë prindërve të moshuar, duke rrëfyer emocionin dhe vështirësinë e të jetuarit larg tyre.
Në Gjenevë ajo nuk e la pas artin. Përmes mësimdhënies vazhdon t’u përcjellë të tjerëve dashurinë për kulturën, ndërsa vetë kujdeset që edhe fëmijët e saj të mos humbasin rrënjët shqiptare.
Në kujtesën e publikut, Mira Bregu mbetet ajo vajza e skenës që u vlerësua që në vitin 1995 me “Ditë Karnavalesh” dhe më pas mori pjesë në festivale të rëndësishme si “Festivali i 34-t”, “Këngët e Stinës”, “Mikrofoni i Artë”, “Top Fest” dhe “Kënga Magjike”.
“Magjia e kitarës”, “Jeto”, “Histori mature”, “Jam me ty”, “Qaj” dhe “Magjia e tangos” janë disa prej këngëve që shënuan rrugëtimin e saj muzikor. Por një tjetër kapitull i veçantë do të hapej në Gjenevë, aty ku Mira do të raportonte nga Pallati i Kombeve për 70-vjetorin e OKB-së.
Krahas muzikës, ajo nisi të pasqyronte tema të mëdha botërore, nga ndryshimet klimatike te krizat e refugjatëve dhe forumet ekonomike. Sot, mes dy botëve, Mira Bregu vazhdon të dëshmojë se largimi nga atdheu nuk do të thotë domosdoshmërisht largim nga identiteti.
Sepse disa këngë, disa kujtime dhe një dashuri e vjetër për Shqipërinë nuk largohen kurrë./abcnews.al
