Presidenti Ilir Meta ka ndarë foto nga mesha e mbajtur ditën e sotme në fillim të shërbesës së Arqipeshkvit Metropolitan Imzot Arjan Dodaj.
Në foto Meta shfaqet pranë kryetares së Kuvendit Lindita Nikolla ndërsa në një rresht pranë tij ndodhet i ulur edhe kryeministri Edi Rama me të shoqen Linda Rama. Pas tij është pozicionuar edhe kryedemokrati Lulzim Basha.
“I nderuar të marr pjesë sot në një ngjarje shumë të rëndësishme për besimtarët katolikë të Arqidioqezës Tiranë-Durrës, në Meshën e Shenjtë të fillimit të shërbesës baritore të Arqipeshkvit Metropolitan Imzot Arjan Dodaj.
Bashkohem me lutjet dhe urimin e përzemërt për punë të mbarë, me bekimet e Zotit, për përmbushjen me sukses të misionit dhe detyrës së re të Sh.T. Imzot Arjan Doda”, shkruan Meta.
Në përfundim të meshës ata u larguan njëri pas tjetrit duke shmangur një takim të mundshëm në ambientet e jashtme. /abcnews.al
