Dimrin e shkuar Napoli dhe Hellas Verona arritën marrëveshjen për transferimin e Amir Rrahmanit në stadiumin “Maradona” dhe gjithçka u materializua në verë.
Kapiteni i Kosovës shkoi në Napoli si zëvendësues i Koulibaly, i cili pritej të largohej në verë në një klub më të madh, por pandemia ndali gjithçka dhe ai mbeti në Napoli, duke mos e liruar vendin e Rrahmanit.
Dardani nuk ka pasur thuajse fare hapësira në këtë sezon, teksa debutimi në një ndeshje zyrtare me Napolin erdhi vetëm mbrëmjen e djeshme, kur u fut në fushë në vend të grekut Manolas në ndeshjen ndaj Cagliarit.
Sot për mediet italiane ka folur agjenti i mbrojtësit dhe ish-lojtari i kombëtares kuqezi, Adrian Aliaj. Ai shprehet se Amir nuk e diskuton largimin dhe ka besim te trajneri Gattuso, por mbrojtësit i duhet pak kohë për tu ambientuar.
“Jam shumë i lumtur për Amirin. Nuk kam asnjë dyshim në cilësitë e tij. Do të qëndrojë gjatë në Napoli, ne besojmë te Gattuso dhe në projektin e klubit. Duhet pak durim, por gjithçka do të shkojë më së miri. Unë besoj vërtetë te lojtari im”, u shpreh Aliaj. /abcnews.al
