Më shumë se 6.500 pjesëtarë të stafeve akademike dhe mësues izraelitë, si dhe afërsisht 1.000 prindër, nënshkruan peticione të hënën duke i kërkuar qeverisë në Tel Aviv të sigurojë lirimin e pengjeve të mbajtur në Rripin e Gazës, edhe nëse kjo nënkupton përfundimin e luftës në enklavën palestineze.
Sipas gazetës izraelite Haaretz, rreth 3,500 profesorë në arsimin e lartë kanë nënshkruar një peticion në mbështetje të një letre të mëparshme nga rezervistët e Forcave Ajrore izraelite që kërkonin kthimin e pengjeve dhe përfundimin e luftës.
“Ne, anëtarët e stafit akademik në institucionet e arsimit të lartë, i bashkohemi thirrjes së ushtarëve të Forcave Ajrore dhe kërkojmë kthimin e menjëhershëm të pengjeve, edhe nëse kjo kërkon ndërprerjen e luftës menjëherë”, thuhet në peticion.
Anëtarët e stafeve akademike kanë pohuar se “lufta u shërben kryesisht interesave politike dhe personale. Vazhdimi i saj do të çojë në vdekjen e pengjeve, ushtarëve dhe civilëve të pafajshëm dhe do të thajë forcat rezervë”.
Ata kanë shtuar se “siç është treguar në të kaluarën, vetëm një marrëveshje e negociuar mund të sigurojë kthimin e sigurt të të rrëmbyerve në Izrael”.
Në një peticion të ngjashëm, mbi 3.000 mësues kanë theksuar se “kjo nuk është një thirrje për të refuzuar shërbimin ushtarak, por një lutje për të shpëtuar jetë”, shtoi e përditshmja.
