Mali i Zi është një vend malor me një vijë bregdetare të bukur, i vendosur midis Kroacisë në veri dhe Shqipërisë në jug. Mali i Zi ka relativisht pak marina në krahasim me Kroacinë fqinje dhe Greqinë, dhe është në një fazë fillestare të këtij zhvillimi. WA Yachting Consultants u ftua në Mal të Zi për të vlerësuar mundësitë e ankorimit të jahteve dhe zhvillimit të marinave përgjatë bregdetit, dhe për të ofruar koncepte fillestare për dy zona të zgjedhura. Bazuar në vlerësimin fillestar, dy vende janë rekomanduar për zhvillim dhe është bërë një vlerësim më i detajuar i kostove dhe të ardhurave të zhvillimit. Më i miri prej tyre është Porto Montenegro, i vendosur në Gjirin e Kotorrit të mbrojtur nga UNESCO, i cili kombinon një destinacion spektakolar jetese me një marinë të klasit botëror, me shërbime të plota dhe fshat rezidencial luksoz që ofron prona të paluajtshme premium për shitje dhe me qira në këtë pjesë të Mesdheut. Plotësimi i vendeve për ankorim dhe marinës mbresëlënëse me 450 vende, e bën atë një një skenë ndërkombëtare, që ofron që nga gastronomia e klasit botëror, bare elegante dhe bistro, si dhe një sërë pajisjesh sportive, argëtimi dhe kulturore, duke bashkuar markat e njohura ndërkombëtare dhe bizneset lokale. . Një përzierje dinamike e mbi 80 njësive të shitjes me pakicë përfshin modën dhe aksesorët, shërbime të ndryshme si dhe shërbimet dhe komoditetet për jahtet.
Kroacia
Kroacia, që nga fillimi i shekullit, është bërë një nga destinacionet më të njohura të sporteve ujore dhe magjia mbetet ende e pandërprerë. Të apasionuarit pas sporteve ujore gjejnë një infrastrukturë shumë të mirë detare, gjire romantike, qytete port dhe restorante të shkëlqyera. Por, rreth fundit të shekullit, Kroacia ishte ende një vend i vogël në tregun ndërkombëtar të turizmit. Kjo ka ndryshuar në mënyrë dramatike dhe turizmi detar luajti një rol të rëndësishëm. 1185 ishuj shtrihen si një varg perlash përgjatë bregut. Shumë prej tyre janë të zhveshura dhe duken si peizazhe hënore, të tjerat janë të mbuluara nga shkurre të gjelbra dhe aromatike dhe pyje pishe. Kroatët kanë shfrytëzuar bukurinë piktoreske dhe kanë krijuar kushte ideale për sportet ujore. Ndërsa në vendet e tjera progresi ka ngecur, kroatët kanë investuar shumë para në zgjerimin e marinave ekzistuese dhe ndërtimin e marinave të reja. Kështu, vendi midis Umag dhe Dubrovnikut tani mund të mburret me pothuajse 70 marina dhe 340 porte. Ato variojnë nga marinat e ndërtuara në një ishull shkëmbor të vogël dhe djerrë, aq unik sa ACI Marina Pishkera, deri tek mega marinat si Marina Dalmatia në Sukoshan. Simpatike janë portet e shumta të bukura si Hvar, Korçula, Trogir, Supetar, Vodice, Primoshten dhe disa të tjera. Aty mund të ankorosh nëse gjen një vend të lirë, pothuajse në mes të sheshit kryesor të tregut. Për shkak të kërkesës së madhe për vend ankorimi të përhershëm dhe tranzit, niveli i çmimeve është rritur ndjeshëm dhe tashmë është pjesërisht në të njëjtin nivel si në Itali apo Spanjë.
Ata që preferojnë të vendosen aty, mund të zgjedhin nga afro 1000 vend-ankorime. Në natyrë dhe parqe kombëtare dhe pranë disa porteve, ankorimi është me pagesë. Në Kroaci ka një numër të madh plazhesh me zhavorr të imët dhe të trashë, gurë ose shkëmb. Plazhi më i famshëm kroat është Zlatni Rat (“Bri i Artë”) në ishullin Braç. Maja e kepit ndryshon drejtimin në varësi të rrymës dhe erërave. Bregdeti kroat ka një rrjet prej mbi 50 marinash, të gjitha të bashkuara në Shoqatën e marinave kroate. Kapaciteti i tyre i përgjithshëm është 16,000 vend-ankorimesh në det dhe 8,500 në tokë. Ka gjithashtu rreth 30,000 vend-ankorime në porte. Marinat mbulojnë të gjithë bregdetin kroat nga Umagu në Dubrovnik. Shumica e tyre janë të vendosura në qytete më të mëdha, ndërsa disa janë të vendosura në gjire të mbrojtura mirë, në afërsi të atraksioneve më interesante natyrore dhe kulturore. Shumë marina kroate kanë pasuruar ofertën e tyre me furnizimin me ujë dhe energji elektrike, me kuzhinë të shkëlqyer tradicionale, ofertë charter, apartamente, qendra shëndetësore, bare dhe shërbime të tjera shtesë. Një numër në rritje marinash kroate shpërblehen me flamurin blu, një çmim ndërkombëtar ekologjik për projektet që synojnë ruajtjen e detit dhe vijës bregdetare.
Klubi Ndërkombëtar Adriatic Croatia, i njohur si Klubi ACI, është një kompani lider në turizëm detar në Kroaci me një zinxhir unik prej 21 marinash që shtrihen nga Umagu në veri të Adriatikut deri në Dubrovnikun në Adriatikun jugor dhe që ofrojnë një nivel të lartë shërbimi të njohur.
BOSNJË HERCEGOVINA
Edhe fqinja e Kroacisë, Bosnja dhe Hercegovina, me një vijë të vogël bregdetare, ka tre marinat e veta, Neum Crkvice Marina, Neum Harbour dhe Neum Jazine Marina, të gjitha në Neum.
SLLOVENIA
Nga ana tjetër, Sllovenia ka marina të bukura, si Marina Bernardin, ose Kompleksi Turistik Bernardin i vendosur në zonën midis Piranit dhe Portorozit. Një tjetër, Izola Marina ndodhet në Izola, një qytet i mrekullueshëm i vjetër në bregdetin slloven. Marina Izola ndodhet në periferi të qytetit dhe u ofron miqve gjithçka që e bën jetën komode në tokë dhe në det. Vizitorët mund të përdorin zona shërbimi dhe hapësira të gjelbra, vende parkimi të mbuluara dhe të pambuluara, kalata të mëdha, agjenci që shesin varka me vela të përdorura dhe të reja dhe anije me qira (charter) dhe shumë gjëra të tjera.
Ndërsa Marina Koper ndodhet afër qendrës së vjetër të qytetit. Është port tranzit shumë i frekuentuar, pasi ka pozicion të mirë dhe është i mbrojtur mirë nga era. Marina ofron 75 vend-ankorime në det dhe ka lidhje për energji elektrike dhe ujë.
Marina Portoroz është një port modern, i cili ndodhet në skaj të qytetit Portoroz. Është porti më i afërt për jahte në Evropën e Mesme. Marina Portoroz është pikënisja ideale për lundrim në detin Adriatik. Ka shërbim teknik të jahteve, apartamenteve, restoranteve dhe qendrave sportive.
Një tjetër marinë, marina në Piran ndodhet në zemër të qytetit të vjetër. Këtu mund të shihen shumë varka, jahte, dhe varka interesante të vjetra peshkimi. Në Piran Mandrac kryesisht anijet e ankoruara janë nga anëtarët e Shoqërisë Detare të Piranit. Shoqëria është një shoqatë joqeveritare, vullnetare, jofitimprurëse, jopolitike e njerëzve që janë aktivë në fushën e sportit, rekreacionit dhe ekologjisë.
Pranë liqenit Ptuj ndodhet Marina Ranca, e cila është e vetmja dhe e para detare në tokë në Slloveni. Marina ofron 60 ankorime të përhershme për varkat me vela dhe varkat e tjera.
GREQIA
Me më shumë se 3000 ishuj, secili i vecantë në karakterin e vet, Greqia ka diçka për të gjithë. Në dy dekadat e fundit, porte dhe marina të reja janë ndërtuar në të gjithë zonën e Mesdheut. Në Greqi, megjithatë, disa projekte marinash kanë nisur, por nuk kanë përfunduar për arsye të ndryshme. Kjo shpjegon pse ka më shumë se 500 porte, por vetëm pak më shumë se 40 marina në Greqi sot, dhe jo të gjitha mund të përshkruhen si porte jahtesh të zhvilluara mirë. Por portet e shumta piktoreske të qyteteve si Simi, Port Gaios ose Kioni janë unike pasi mund të ankorohet jahti praktikisht në mes të sheshit qendror të tregut.
SHQIPËRIA
Numri i vizitorëve të jahteve turistike në Shqipëri po rritet por vendi nuk ka ende marina të mirëfillta. Portet kryesore të hyrjes, Durrësi, Vlora dhe Saranda janë të gjitha porte tregtare me pak ose aspak lehtësira për jahte. Emaar Group me bazë në Dubai është angazhuar për një zhvillim të infrastrukturës me një investim prej 2 miliardë eurosh dhe marrëveshja e bashkëpunimit u nënshkrua në nëntor 2020, e përqendruar në transformimin e portit tregtar të Durrësit dhe infrastrukturës rezidenciale përreth. Në tetor 2020, Qeveria miratoi Planin Kombëtar Sektorial të Transportit Detar dhe Infrastrukturës Portuale, ku parashikonte zhvendosjen e të gjitha porteve të mallrave nga vendet aktuale urbane dhe rizhvillimin e këtyre të fundit në marina dhe pasuri të patundshme turistike të nivelit të lartë. Ajo miratoi gjithashtu ndërtimin e marinave të reja, me kusht që ato të plotësonin të gjitha nevojat e një porti me shërbim të plotë.
Plani i infrastrukturës përshkruan rizhvillimin e të katër marinave të Shqipërisë, dy prej tyre specifike për superjahtet. Ministrja shqiptare Belinda Balluku tha se dy projektet më të mëdha të infrastrukturës detare turistike, në Durrës dhe Vlorë, parashikojnë një akomodim të kombinuar prej 130 superjahtesh, nga 30 deri në 200 metra, duke ofruar vend për ankorim, furnizim me karburant, shërbime, mirëmbajtje dhe të tjera. Porti i Durrësit është një qendër tregtare shumë e rëndësishme që përbën pikën kryesore hyrëse për Korridorin VIII Pan-Evropian, që lidh Maqedoninë dhe Bullgarinë, duke mbuluar më shumë se 80% të tregtisë në Shqipëri. Në përgjigje të kësaj, operacionet tregtare do të transferohen në Porto Romano.
TURQIA
Lundrimi në bregdetin turk është një nga eksperiencat më të paharrueshme. I quajtur gjithashtu bregdeti Turquoise (Turkuazë), ai shtrihet mbi pothuajse 1600 km vijë bregdetare. Ka disa destinacione përgjatë bregdetit për të arritur ose me traget nga Greqia ose me avion në një nga katër aeroportet kryesore ndërkombëtare përgjatë bregdetit, Izmir, Bodrum, Dalaman dhe Antalia. Transporti tokësor nga aeroportet në qendrat e jahteve është gjithashtu i strukturuar shumë mirë. Zhvillimi i marinave të reja vitet e fundit u ka dhënë detarëve një mundësi të madhe zgjedhjesh për ankorim. Në rajonin e Mesdheut, marinat e Turqisë kanë një reputacion shumë të mirë për shërbimin, infrastrukturën dhe pastërtinë.
Tregu turk i lundrimit është zgjeruar vitet e fundit dhe bashkë me të, edhe një bum i marinave dhe objekteve për jahte në të gjitha qytetet dhe qytezat përgjatë bregut jugperëndimor. Mund të gjesh shërbime teknike, kantiere varkash, prodhues velatash, kompani charter, objekte të mira tregtare, shkolla lundrimi, shitës anijesh, në thelb gjithçka që dëshiron. Po kështu, kompanitë e shumta charter janë të vendosura në pjesët më të sigurta dhe më të mbrojtura të bregdetit turk dhe të gjitha ofrojnë akses të mirë për në aeroportet ndërkombëtare.
/abcnews.al/
