Pas vrasjes së minorenit me thikë, një 27-vjeçar u qëllua me breshëri mëngjesin e sotëm në Mamurras. Paraprakisht që ngjarje ka lidhje me hakmarrjen pasi familja e viktimës ishte në konflikt për një plagosje të viteve më parë.
Indrit Pepa, një i ri që ka studiuar në Hanovër të Gjermanisë u qëllua me breshëri kallashnikovi në errësirë pranë xhamisë së Mamurrasit. Ai po futej në shtëpi pasi kishte ndenjur më shokët kur duket se vrasësi e ka ndjekur deri kur mbeti vetëm. 27-vjeçari humbi jetën rrugës për në spital.
Nuk dihen ende rrethanat e ngjarjes, por mësohet se familja e të riut ka patur një konflikt të mëparshëm. Në njoftimin e policisë, autori i dyshuar u shpall në kërkim dhe ai është Azis Markola, 49 vjeç nga Mamurrasi.
Por policia nuk afroi detaje nëse ishte pikërisht Markola hasmi i familjes së Pepës për shkak të një plagosjeje të viteve më parë. Ajo që dihet është fakti që Pepajt nuk ishin ngujuar, por ruheshin nga ndonjë sulm hakmarrjeje.
Vetë Indrit Pepa në faqen e tij të Facebook ka shënuar se jetonte jashtë Shqipërisë, në Amsterdam të Hollandës dhe studimet i kishte kryer në Hamburg të Gjermanisë. Këto ditë, ai ndodhej për pushime pranë familjes së tij në Mamurras.
/abcnews.al
