Ministri i Jashtëm i Iranit paralajmëroi se nëse hakmarrja e Izraelit në Gaza nuk ndalet, SHBA “nuk do t’i shpëtojë këtij zjarri”.
Duke folur në Kombet e Bashkuara, Hossein Amirabdolakhian tha se “Unë u them sinqerisht politikanëve amerikanë, të cilët tani po menaxhojnë gjenocidin në Palestinë, se ne nuk e mirëpresim një zgjatje të luftës në rajon. Por nëse gjenocidi në Gaza vazhdon, ata nuk do t’i shpëtojnë këtij zjarri.”
Izraeli është zotuar të eliminojë Hamasin, në shenjë hakmarrjeje për sulmet e 7 tetorit që morën jetën e 1400 njerëzve. SHBA mbeti një aleat i fortë i Izraelit dhe tha se do ta mbështeste atë pas sulmeve.
Sipas ministrit të Jashtëm iranian, Hamasi i ka thënë Iranit se është gati të lirojë pengjet civile, duke shtuar se bota duhet të bëjë presion për lirimin e 6000 palestinezëve të mbajtur në burgjet izraelite.
