Koordinatori për Anti-Korrupsionin Global i qeverisë Amerikane, Richard Nephew është takuar me kreun e SPAK, Altin Dumani.
Gjatë takimit me kreun e SPAK, ka konfirmuar mbështetjen e Shteteve të Bashkuara për reformat në drejtësi.
“Shtetet e Bashkuara do të vazhdojnë të mbështesin institucionet e drejtësisë që po forcojnë demokracinë e Shqipërisë teksa ajo përparon në rrugën e saj drejt BE-së”.
Gjithashtu ambasada e SHBA në Tiranë, ka ndarë detaje nga takimi i kreut të SPAK me Richard Nephew. Nëpërmjet një statusi në Facebook, theksohet se Nephew dhe zyrtarë shqiptarë diskutuan përpjekjet e vazhdueshme për forcimin e pavarësisë së gjyqësorit dhe luftën kundër korrupsionit.
“Koordinatori për Anti-Korrupsionin Global Richard Nephew pa sot në veprim institucionet gjyqësore shqiptare gjatë takimeve me kreun e SPAK, Altin Dumani, prokurorët e SPAK, si dhe përfaqësues të Ministrisë Anti-Korrupsion, Inspektoratit të Lartë të Deklarimit dhe Kontrollit të Pasurive dhe Konfliktit të Interesit (ILDKPKI) dhe Agjencisë së Prokurimit Publik. Nephew dhe zyrtarët shqiptarë diskutuan përpjekjet e vazhdueshme për forcimin e pavarësisë së gjyqësorit dhe luftën kundër korrupsionit. Shtetet e Bashkuara do të vazhdojnë të mbështesin institucionet e drejtësisë që po forcojnë demokracinë e Shqipërisë teksa ajo përparon në rrugën e saj drejt BE-së”, shkruan ambasada e SHBA në një reagim në Facebook.
/abcnews.al/
