Mesfushori i Manchester City, David Silva, duket se do ta vazhdojë karrierën e tij në Seria A. Fantazisti spanjoll aktualisht është pa kontratë dhe pak javë më parë ai lajmëroi largimin nga skuadra angleze. Tashmë ai është shumë pranë një kalimi te Lazio, ku pritet që brenda pak ditëve të vijë dhe konfirmimi zyrtar nga klubi italian.
Sipas raportimit të “Il Corriere della Sport”, vëllai i lojtarit e ka vizituar qendrën stërvitore Formello dhe po sipas gazetës Silva e ka pranuar ofertën e lacialëve. Kanë mbetur disa detaje të vogla për t’u diskutuar në kontratën e mesfushorit, por shumë shpejt pritet që edhe ato të mbyllen nga të dy palët.
David Silva ka konfirmuar se nuk do të jetë më një lojtar i City, por ai do të largohet kur të mbarojë aventura europiane e “Qytetarëve”. Ata luajnë kundër Real Madridit në Champions League dhe menjëherë sapo City të mbyllë garën ai do të largohet. Vendimin nëse ai do t’i bashkohet apo jo Lazios, Silva pritet që ta marrë ditën e diel. /abcnews.al
