Sulmuesi i Arsenal, Alexandre Lacazette, është pothuajse i larguar nga londinezët. Ishte vetë lojtari që kërkoi largimin nga “Topçinjtë” dhe deklarata e tij u mbështet edhe nga trajneri Arteta. Megjithatë, klubi anglez nuk ka humbur aspak kohë dhe po mendon për zëvendësuesin e francezit.
Sipas raportimit të “Calciomercato.com”, drejtuesit e Arsenal e kanë tashmë një emër për sulmin. Bëhet fjalë për yllin e Eintracht Frankfurt, Andre Silva, i cili ka përfunduar në radarin e anglezëve. Portugezi i ka habitur të gjithë këtë sezon dhe aktualisht është golashënuesi dytë më i mirë në Bundesliga me 19 gola, pas Robert Lewandowskit.
Kontrata e Silvës me gjermanët përfundon në vitin 2023 dhe vlera e kartonit të tij vlerësohet diku te 37 milionë euro. Ende nuk ka kontakte zyrtare mes klubeve, por më shumë pritet të mësojmë gjatë merkatos së verës, ku Arsenal do të bëjë gjithçka për të zëvendësuar denjësisht Lacazetten. /abcnews.al
