Pjesë të mëdha të Gjermanisë u prekën nga reshjet e dendura të borës, shiu i ftohtë dhe erërat e forta, të cilat goditën vendin gjatë natës së kaluar dhe sot, njoftoi Shërbimi Meteorologjik Gjerman (DVD).
Linja ajrore kombëtare gjermane Lufthansa ka paralajmëruar se moti i keq mund të shkaktojë ndërprerje të fluturimeve në Gjermani, Austri dhe Zvicër, raporton Deutsche Welle.
Rreth 120 fluturime janë anuluar në aeroportin më të madh gjerman në Frankfurt, ndërsa kushtet e motit kanë prekur edhe aeroportet e Mynihut dhe Shtutgartit. Për shkak të borës së madhe, linjat e trenave janë ndërprerë edhe në disa pjesë të Gjermanisë. DVD lëshoi paralajmërime për akull në zonën midis Pyllit të Zi, Liqenit të Konstancës dhe pyllit bavarez, duke u kërkuar shoferëve dhe këmbësorëve që të qëndrojnë në shtëpi sa më shumë që të jetë e mundur, duke paralajmëruar se akulli i madh mund të jetë veçanërisht i rrezikshëm për përdoruesit e rrugës pasi është e vështirë të shihet dhe është jashtëzakonisht i rrëshqitshëm. Dhjetëra aksidente trafiku janë raportuar në pjesët perëndimore të Gjermanisë./abcnews.al
