PRESHEVË- Shqiptarët e Luginës së Preshevës, Medvegjës e Bujanocit, në zgjedhjet parlamentare që u zhvilluan të dielën në Serbi garuan të ndarë me dy lista, ndërsa dhe pjesëmarrja ishte shumë e ulët.
Kryetari i Komunës së Preshevës, Shqiprim Arifi u shpreh se kryeministri i Kosovës Albin Kurti ka kontribuuar si faktor përçarës mes shqiptarëve.
Gjatë një interviste për Ballkan Update, Arifi tha se Kurti mund të kontrolloje “servilët politikë”, por jo qytetarët e Luginës.
“I kontrollon servilët, por nuk e kontrollon popullin tonë. Nuk e kontrollon fare Preshevën dhe nuk ka mundësi ta kontrollojë”, theksoi Arifi.
Ai theksoi se shumë qytetarët i bojkotuan zgjedhjet pasi Kurti mbolli “farë përçarëse” mes shqiptarëve.
“Beteja ishte me Kamberin dhe Kurtin. Nuk është një betejë me fuqi të barabartë. Mbi 60 mijë shqiptarë i kanë bojkotuar zgjedhjet për shkak të përçarjeve. Për mua është një betejë e humbur në këtë vend, sepse me 13 mijë vota Kamberi nuk kishte mundësi për të marrë mandat”, tha ai./ abcnews.al
