Gjatë rrëfimit në emisionin “Pas Mesnate”, studiuesi Shaban Sinani ka bërë dhe një krahasim të kohës kur ka punuar me Ramiz Alinë dhe më pas me Sali Berishën, kur ky i fundit ishte president.
Ai ka deklaruar se ishte një diferencë shumë e madhe mes të dyve, pasi Berisha donte t’i mbyllte punët sa më shpejt dhe me padurim.
Studiuesi tha se dha dorëheqjen që javën e parë, por Berisha i kërkoi të qendronte dhe për disa muaj.
“Duke perifrazuar një mik timin, dallimi ishte i madh. Ramiz Alia ishte mësuar t’i lëshonte pe balonës, ishte rritur në mjedise qytetare, kurse Berisha nuk e kishte pasur shansin që të luante me balona, kur i ra në dorë balona ishte për ta shtrënguar, për ta mbajtur dhe jo për të lëshuar pe. Natyrisht që ishin më shumë se alternative, Ramiz Alia i rritur në Lice, në shkollat më të shquara të kohës dhe me shkollën e luftës dhe me formimin jashtë vendit si qytetarë intelektual, i durueshëm, dialogues dhe me një eksperiencë jetësore shumë të madhe. Në anën tjetër, Berisha me padurimin, me vrullin, me dëshirën për t’i mbyllur punët sa më shpejt, në shumicën e rasteve jo me rrugën që e kërkonte sistemi i ri përmes dialogimit. Ramiz Alia më zgjodhi, Berisha më gjeti dhe që prej javës së parë unë i kam kërkuar dorëheqjen, duke i përmendur që në detyrë duhet të plotësohen dy kritere, kriteri i kompetencës dhe kriteri i konfidencës, dhe një prej këtyre unë nuk e kam, kështu që duhet të më mirëkuptoni për largimin tim, por ai më kërkoi vetë që të qendroja dhe për një periudhë, sepse ndodhi kalimi i administratës së kreut të shtetit. Unë punova diku tre muaj dhe nga priilli deri në fund të qershorit, kur largova”, rrëfeu Sinani./abcnews.al
