Izraeli akuzon Hamasin për përdorimin e civilëve si “mburoja”

Forcat e armatosura izraelite akuzuan sot grupin islamik palestinez Hamas për përdorimin e civilëve si “mburoja”. Forcat e armatosura izraelite deklarojnë gjithashtu se Hamasi ka vrarë qëllimisht civilët dhe ka rrëmbyer shumë prej tyre.

Hamasi, i cili sundon Rripin e Gazës, nisi një sulm të befasishëm ndaj Izraelit të shtunën në mëngjes. Palestinezët e armatosur hynë në Izrael nga toka, deti dhe ajri. Grupi palestinez, i cili është cilësuar si organizatë terroriste nga Bashkimi Europian, Shtetet e Bashkuara dhe Izraeli, që atëherë ka lëshuar mijëra raketa në drejtim të Izraelit. Vendi u përgjigj me kundërsulme.

Hamasi ka vrarë qindra izraelitë dhe ka rrëmbyer më shumë se 100 njerëz, duke përfshirë gra, fëmijë dhe të moshuar, dhe i ka çuar në Rripin e Gazës, sipas Izraelit. Si përgjigje, Forcat Ajrore izraelite bombarduan objektivat e Hamasit në enklavë.

/abcnews.al