Arjet Gega, infektolog në Shtetet e Bashkuara të Amerikës në një biseëdë të zhvilluar me gazetaren juli Xhokaxhi në Byro Politike, u shpreh se Shqipëria ka keqmenaxhuar situatën e epidemisë në vend.
Gega shprehu rezerva për mënyrën si janë trajtuar fazat e epidemisë, dhe se vendi kishte 3 muaj kohë për të marrë masa, që ndërkohë nuk i mori, por sipas tij, thjesht izoloi njerëzit.
Sipas infektologut, gjatë këtyre muajve, Shqipëria duhet të gjeneronte të dhënat, dhe të merrte informacion për numrin e saktë të infektimit dhe vdekshmërisë nga Covid. Këto të dhëna sipas tij mund të siguroheshin përmes testimeve, gjë që në Shqipëri nuk u bë dhe të dhënat ekzakte në lidhje me të infektuarit mungojnë.
“SHBA është një vend i madh dhe heterogjen, shpesh herë përgjigja varet nga shteti përkatës. Po flas për shtetin e Conecticut ku dhe banoj dhe është vendi më i goditur, piku i infektimit këtu ishte rreth muajit Prill.
Mund të them që sot në një zonë urbane, kishim vetëm 4 të shtruar ndërsa kishim vetëm 3 pacientë pozitivë atje ku testohen me qindra njerëz në ditë. Në prill % e pozitivitetit është në 40%, pra duket se kurba është drejt pozitivitetit.
Mund të them që për njëfarë kohe jam munduar të qëndroj larg kritikimit të mënyrës se si është menaxhuar situata në Shqipëri. Ajo që mendoj është se distancimi social nuk është destinacion, ai është një mjet.
Shqipëria kishte 3 muaj kohë në avancë për të marrë masa, kjo nuk ishte një kohë për të vrarë miza, dhe thjesht të mbylleshin njerëzit brenda. Duheshin bërë 3 gjëra:
Gjenerimi i datave, të dhënave, duhej informacioni. Si mund të merreshin këto të dhëna? Duhej një numër sa më afër të vërtetës i numrave të infeksionit dhe kjo arrihet patjetër me testime.
Në Shqipëri testimet u mbyllën me drynin e 127. Shumë njerëz asimptomatikë, apo simptomatikë të cilët kanë patur ekspozime të dyshimta, nuk u testuan kurrë.
Shumë mjek primar donin që pacientët e tyre të testoheshin dhe nuk patën mundësi. Duheshin të dhëna për numrin e vdekshmërisë. Shqipëria është një vend ku mbi 80 % e njerëzve vdesin në shtëpi, e kundërta ndodh me SHBA, ku njerëzit vdesin në spitale apo në qendrat shëndetësore.
Ajo që mund të bëhej ishte shumë kollaj, gjithë vdekshmëria brenda pandemisë duhej testuar, dhe do të krijonte data shumë ekzakte, dhe do të dihej çfarë vdekshmërie do të kishte. Kjo është një statistikë që përdoret më shumë në planet e hapjes.
Së treti është statistika e hospitalizimeve. E rëndësishme ishte që gjatë këtyre 3 muajve të luftohej drejt zgjerimit të kapaciteteve, të zgjerimit të testeve sepse aktualisht në Shqipëri jemi në vend numëro.
Me sa kam dijeni nuk është se është bërë ndonjë punë e rëndësishme në rritjen e numrave të shtretërve, të shtretërve të reanimacionit, të numrave të ventilatorëve etj. Është tepër e rëndësishme që gjatë kësaj periudhe të dihej sa të infektuar pati dhe si u infektuan.
Kriteret që përdoren për hapjen është në radhë të parë rënie e numrit të infeksioneve, që në Shqipëri ishte varianti sharrë, që asnjë nuk e di cfarë ndodhi. Shqipëria u mbyll me 20 raste dhe u hap po me 20 raste”, u shpreh Gega.
Por infektologu Gega u shpreh gjithashtu se rol negativ ka luajtur edhe fakti i mosbindjes së popullatës ndaj pandemisë. Sipas tij, popullata kishte nevojë për mesazhe të qarta, për edukim dhe jo për urdhra.
“Drama më e madhe në Shqipëri është se opinioni publik nuk është bindur. Pika e tretë e përgatitjes ishte edukimi i popullatës dhe realizimi i një normale të re, duke vendosur maska ku njerëzit kanë respekt për sipërfaqen normale të secilit duke u treguar të kujdesshëm.
Si u humb opinioni publik në Shqipëri? Opinioni publik kishte nevojë për sinjale të qarta. Në Shqipëri opinioni publik mori sinjale të tipit; sot do dalin gratë shtatzëna, nesër burrat etj…disa urdhëresa në orën 8 të mëngjesit, me sytë me sklepa nga Surreli. E dyta; njerëzit u ndaluan të lëvizin me makina, kjo është mënyra më e thjeshtë dhe më e sigurt për të lëvizur.
Mënyra e komunikimit duhej përdorur me takt, me dashuri me njerëzit. Nuk mund të flitet me kërcënime, nuk kishte nevojë për urdhra por për edukim të popullatës. Nuk e di sa specialistë apo virologë ka Shqipëria, por komiteti i ekspertëve nuk e di se sa të drejtë kanë të flasin.
Siç e thashë me disa masa radikale, shumë të shpejta mund të bëhet një punë kolosale. Ne do shohim në ditët në vijim numrat reale”, theksoi Gega./abcnews.al
