Diego Godin vendosi të ndahej me Atletico Madrid verën e kaluar. Kapiteni i dha fund aventurës 9-vjeçare me “Colchoneros” dhe zgjodhi Interin për të vazhduar karrierën. Aventura zikaltër nisi mirë, por më pas nisën problemet dhe qendërmbrojtësi përfundoi në stol.
Ai nuk ia doli të përshtatet në skemën me tre mbrojtës të Antonio Contes, edhe pse eksperienca nuk i mungon. 34-vjeçari ka vendosur të largohet nga Serie A dhe ka oferta nga Spanja dhe Anglia. Todofichajes raporton mbi mundësinë e një rikthimi tek Atletico Madrid.
Diego Simeone ka mbetur shumë i lidhur me lojtarin uruguaian dhe po mendon t’i dhurojë një kontratë të re. Trajneri argjentinas do e priste krahëhapur lojtarin e qindra betejave, teksa të njëjtën dëshirë kanë edhe tifozët. /abcnews.al
