Tre makina u përfshirë nga flakët në orët e para të së martës në lagjen ‘Pavarësia’ në Vlorë në zonën e njohur si Albano & Romina. Dy nga makinat u dogjën pjesërisht dhe tjetra plotësisht.
Makinat i përkasin shtetasve Petref Koshena, Artur Hysi dhe Nerizan Hoxha. Ky i fundit, mjeti i të cilit u dogj i pari, thotë se nuk dyshon tek asnjë person dhe se nuk e di pse ia kanë bërë këtë gjë.
“Unë punoj në ndërtim. Kam parkuar si çdo natë këtu. Nuk kam asnjë dyshim. S’e di pse më është bërë kjo gjë. Shpresoj që policia ta gjejë personin.”, tha ai për gazetarin e ABC News, Elton Nika.
Dyshohet se zjarri i është vendosur ‘Ford-it’ me targa AB 634 AP dhe nga flakët janë përfshirë edhe dy të të tjerat, një Ford që është djegur pjesërisht dhe një ‘Volkswagen’, e djegur plotësisht.
Kamerat e sigurisë kanë kapur një person me kapele që ka vendosur zjarrin në mjet dhe më pas është larguar. Dyshohet se autori është dëmtuar edhe vetë në tentativë për të ikur./abcnews.al
