Pezullohet aktiviteti i dy shoqërive të kursim -kreditit që operonin në Durrës. Banka e Shqipërisë ka shtuar kontrollet dhe inspektimet ndaj shoqërive financiare ndërsa ka konstatuar një sërë shkeljesh në këto kompani.
Në vendimin për pezullimin e aktivitetit theksohet se kompanitë kanë paraqitur pasqyra financiare të pasakta dhe nuk kanë respektuar normat e mbikëqyrjes.
Në vendimin e Këshillit Mbikëqyrës thuhet se ky subjekt ka shkelur ndër të tjera edhe ligjin për parandalimin e pastrimit të parave, pasi nuk ka marrë informacion mbi burimin e të ardhurave të klientëve dhe nuk ka monitoruar trasaksionet e kryera prej tyre.
Pas shkeljeve Banka e Shqipërisë ka pezulluar ushtrimin e veprimtarive financiare dhe gjatë kësaj periudhe shoqëria e kursim-kreditit “Rrushkull One” dhe “Perlat” nuk mund të ushtrojë aktivitetin e kredidhënies si dhe nuk lejohet mbledhja e depozitave në çdo formë, përshirë edhe depozitimet në llogari rrjedhëse.
Dy shoqëritë e kursim-kreditit prej 3 vitesh kishin nisur bashkimin dhe i është kërkuar që ta mbyllin këtë proces brenda vitit duke i lejuar vetëm vijimin e procedurave të bashkimit.
Në vendim parashikohet që të lejohet vetëm tërheqja e depozitave dhe shlyerja e kësteve të kredisë nga anëtarë të shoqërive.
Banka e Shqipërisë ka shtuar kontrollet dhe inspektimet edhe ndaj shoqërive të kursim-kreditit pas skandalit të ndodhur me mikrokreditë./abcnews.al
