Mbulimi i fytyrës me perçe ose burka do të ndalohet në shkollat e qytetit dhe shtetit federal të Hamburgut, raportojnë mediat gjermane.
“Shkolla dhe mbulimi i fytyrës nuk shkojnë bashkë. Të shohësh fytyrën e bashkëbiseduesit është e rëndësishme për komunikimin”, tha Nils Hansen, një ekspert i arsimit në degën e Partisë Social Demokrate të Gjermanisë (SPD) në Hamburg.
Të gjitha klubet përfaqësuese në senatin e provincës, me përjashtim të partisë së Majtë, votuan për miratimin e një ligji që do të mundësonte ndalimin e mbulimit të fytyrës.
Nisma ligjore u nis pasi një gjykatën e Hamburgut në vitin 2020 pranoi një padi të ngritur nga një nxënëse 16-vjeçare e cila u ankua se ishte përjashtuar nga klasa për vendosjen e perçes. Gjykata më pas shpjegoi vendimin duke thënë se nuk ka bazë ligjore për një ndalim të tillë.
Hansen shpjegoi se perçja në shkollat e Hamburgut nuk është një fenomen masiv, por ai e arsyetoi miratimin e ligjit me nevojën që shkollat të mund t’i referohen ligjit në vendimet e tyre.
Mbajtja e një maskë mbrojtëse si mbrojtje kundër infeksionit dhe një shall si mbulesë e kokës është ende e lejuar.
Në Gjermani, çështja e ndalimit të mbulimit të fytyrës për arsye fetare ngrihet vazhdimisht, dhe duke pasur parasysh që politika arsimore është përgjegjësi e shteteve federale, çështja nuk zgjidhet në mënyrë të njëjtë në të gjithë vendin./abcnews.al
