Manchester City pret Manchester United të mërkurën për gjysmëfinalen e kthimit të Carabao Cup. Dueli i parë i zhvilluar në “Old Trafford” u mbyll më fitoren 1-3 të ekipit të Pep Guardiolës dhe finalja është shumë afër.
Trajneri spanjoll nuk fshihet në prononcimin e dhënë për Goal dhe tregon objektivat e Cityt, që janë triumfi në Champions League, FA Cup dhe Carabao Cup. Guardiola ka ende shpresa për titullin, por Liverpool është shumë larg dhe diçka e tillë është pothuajse e pamundur.
“Në këtë sezon kemi qenë gjithmonë të orientuar drejt fitimit të tre trofeve. Do të vijojmë luftën edhe për titullin kampion, nuk heqim dorë nga ky objektiv. Jemi të vendosur për të fituar çdo trofe. Ndeshjen e radhës e kemi kundër Manchester United në Carabao Cup.
Ky është shansi ynë për të dalë në finale dhe për të tentuar fitimin e saj. Shpresoj që tifozët tanë të mbushin stadiumin. Fitorja të ndihmon për të arritur fitore të tjera“, deklaron Pep Guardiola. /abcnews.al
