Nga Bloomberg
Europa i mbijetoi krizës energjetike pa ndërprerje të konsiderueshme të furnizimit. Më pas punëtorët në Francë dolën në grevë, duke trazuar situatën nga portet në termocentrale.
Trazirat, në shenjë protestë ndaj reformës së propozuar të pensioneve nga presidenti Emmanuel Macron nisën në janar, por janë rritur në gjashtë javët e fundit.
Mungesa e punëtorëve në termocentralet bërthamore dhe hidrocentrale i kanë kushtuar ndërmarrjes Electricite de France SA rreth 1 miliard euro (1.1 miliardë dollarë) dëme.
Franca është zakonisht një central i energjisë europiane, por ndërprerjet kanë ardhur në një moment vendimtar. Rajoni po rimëkëmbet nga kriza e tij më e keqe e furnizimit në dekada, pasi Rusia ndërpreu furnizimin me gaz në vazhdën e luftës në Ukrainë.
Energjia bërthamore franceze, baza e furnizimit me energji elektrike të vendit, është ndërprerë prej muajsh për shkak të ndërprerjeve të reaktorit. Disa aktivitete në objektet energjetike kanë filluar të rimëkëmben pasi protestat kanë filluar të zbehen.
Megjithatë, efektet nga trazirat kanë ndikuar në të gjithë kontinentin. Ndërsa Europa po përpiqet të ngrihet përsëri në këmbë, ajo po e bën këtë me një nga shtyllat kryesore të energjisë të dobësuar.
Por si paraqitet situata?
Lufta për gazin
Tre nga terminalet e gazit natyror të lëngshëm të Francës janë bllokuar kryesisht nga grevat që nga fillimi i marsit. Një i katërt, Dunkerque LNG në Kanalin Anglez, po përballet me ndërprerje të shpeshta. Anijet që transportojnë karburantin janë devijuar drejt vendeve duke përfshirë Spanjën dhe Britaninë e Madhe.
Puna në terminalin Montoir i Elegy SA, mund të rifillojë në ditët në vijim. Por vendi tashmë ka marrë një goditje serioze ndaj importeve të gazit natyror të lëngshëm.
Flukset ranë me 1.1 milion ton nga shkurti në mars, kryesisht për shkak të ndërprerjeve të grevës. Kjo nënkupton rreth 650 milionë euro LNG, sipas llogaritjeve të Bloomberg.
Franca është mbështetur shumë në rezervat e saj të gazit për ngrohje dhe energji elektrike.
Problemet me energjinë bërthamore
Siguria energjetike franceze varet nga puna e reaktorëve bërthamorë të vendit, më e madhja në Europë. Por mirëmbajtja dhe ndërprerjet e paplanifikuara bënë që prodhimi të shënojë rënien në nivelin më të ulët që nga viti 1988.
Grevat kanë dëmtuar më tej prodhimin dhe rifillimin e punës së reaktorve në muajt e fundit. Si rezultat, prodhimi atomik i EDF ra me 7.4% në tremujorin e parë nga një vit më parë, duke rritur shqetësimet për furnizimin me energji bërthamore në afatin e afërt, raporton abcnews.al.
Diçka e tillë ka ndikuar edhe në rritjen e çmimit të energjisë elektrike në Francë, me rreth 50% që nga fillimi i marsit, në më shumë se 220 € për megavat-orë.
Europa u kursye nga ndërprerjet e energjisë dhe racionimi i energjisë gjatë dimrit, kryesisht për shkak të motit të butë dhe përpjekjeve për të kursyer energjinë, ndërsa çmimet e larta vitin e kaluar frenuan kërkesën industriale.
Qeveria franceze kohët e fundit u ka kërkuar bizneseve të kursejnë, veçanërisht duke inkurajuar më shumë punën nga shtëpia, për të reduktuar faturat e energjisë dhe për të ulur konsumin e karburantit.
/abcnews.al
