Loading ...
Greqia nis një iniciativë të re diplomatike për të përshpejtuar zgjerimin e BE në Ballkanin Perëndimor.
Siç zbulon media greke, To Vima, Greqia po shfrytëzon forumin ekonomik të Delfit në Athinë, për të prezantuar nismën e re, që synon ringjalljen e bisedimeve të bllokuara të pranimit nga BE dhe shmangjen e kundërshtimeve rajonale.
Një lëvizje strategjike e diplomacisë greke e cila ka hedhur rrënjët nga kjo e mërkurë, ministri i jashtëm i Greqisë, Giorgos Gerapetritis ka nisur takimet me gjithë homologët e tij të rajonit pa përjashtim, edhe me një takim të parë me ministrin e ri të jashtëm të Shqipërisë, Ferit Hoxha, por edhe Serbisë, Kosovës, Maqedonisë së Veriut, Bosnjes dhe Malit të Zi për ti prezantuar nismën e Greqisë.
Madje është planifikuar ditët në vijim në Forum edhe një takim mes gjithë ministrash, për të nënshkruar deklaratën e Delfit, një veprim simbolik që shenjon orientimin e përbashkët të këtyre vendeve për integrimin europian.
Në këtë kontekst, është parë edhe takimi zyrtar në Pallatin Maximos mes kryeministrit të Greqisë, Kiriakos Mitsotakis dhe Edi Ramës së Shqipërisë, nën një klimë tashmë pozitive si një hap kyç i qasjes së Athinës.
Kjo lëvizje e Greqisë është parë edhe në kontekst më të gjerë. Athina po pozicionet si një avokate kryesore për integrimin e Ballkanit Perëndimor në BE me urgjencë, jo vetëm për arsye ekonomike dhe politike, por dhe stabilitet strategjik.
Greqia duket në një linjë me kupolën e BE, pasi vetëm disa ditë më parë Presidentja e KE, Ursula Von der Lajen paralajmëroi se BE duhet të veprojmë me vendosmëri për të parandaluar që rajoni të bjerë nën ndikimin e Rusisë, Kinës apo Turqisë.
Dhe kjo strategji është afatgjatë, pasi në gjysmën e dytë të vitit 2027, Greqia merr presidencën e Bashkimit Europian, që do të përkojë me një moment kyç për Shqipërinë e Malin e Zi të cilat synojnë të mbyllin negociatat brenda këtij afati.
Synimi minimal i Greqisë është pranimi i të paktën i një vendi në BE brenda kësaj kohe, por shumë shpejt, kryediplomati grek Giorgos Gerapetritis do të zgjerojë nismën e Athinës me një turne diplomatik në gjitha kryeqytetet e Ballkanit Perëndimor brenda pak javësh.
