Google po mbështet një rikthim në zyrë me një investim që do të zgjerojë kapacitetin e tij në Mbretërinë e Bashkuar me 50% dhe do të “ringjallë” mjedisin e punës. Gjigandi i kërkimit do të shpenzojë 730 milion paund dhe pret që numri i punonjësve të rritet nga 6,400 në 10,000. Kompania po blen disa ndërtesa në Londër në zonën që quhet Central Saint Giles, në të cilën aktualisht është qiramarrëse.
Shefi i Google në Mbretërinë e Bashkuar, Ronan Harris i tha “BBC-së” se “investimi pasqyronte besimin e firmës në zyrë si një vend pune”. Ai tha gjithashtu që “ne po blejmë këto ndërtesa dhe ne jemi të prirur të shohim të gjithë të kthehen dhe të shohin përsëri një hapësirë pune të gjallë”. Përveç blerjes së ndërtesës në zonën e Central Saint Giles, Google tha se do të ndërmerrte një rinovim prej shumë miliona paundësh të zyrave për të siguruar që ato të ishin në të njëjtin nivel me zyrat në zonën e King’s Cross”.
Kancelari i Thesarit Rishi Sunak e përshëndeti investimin e Google, duke e përshkruar atë si “një votë e madhe besimi për Mbretërinë e Bashkuar si një qendër teknologjie lider në botë”. Konfederata e Industrisë Britanike tha se kthimi në vendin e punës ishte jetik për rimëkëmbjen ekonomike, veçanërisht për qytetet dhe qendrat e qyteteve të Mbretërisë së Bashkuar. Bizneset e shitjes me pakicë dhe të mikpritjes veçanërisht janë të etur që stafi i zyrës t’u kthehet zakoneve të vjetra, duke marrë kafe, sanduiç dhe duke dalë pas punës në mbrëmje.
Megjithatë, shumë punonjës nuk duan të kthehen me kohë të plotë në zyrë dhe numri i ditëve që punëdhënësit kërkojnë që stafi i tyre të marrë pjesë personalisht po shfaqet si një pikë kyçe e ndryshimit në procesin e rekrutimit. Neil Carberry nga Konfederata e Rekrutimit dhe Punësimit i tha “BBC-së” se “Paga dikur ishte leva kryesore që punëdhënësit mund të përdornin në negociata”. Ajo tha gjitashtu se “pjesëmarrja në zyrë tani është një bisedë kryesore midis firmave dhe punonjësve të mundshëm”. / abcnews.al
