Loading ...
Gjyqi ndaj ish-komandantëve të UÇK-së në Dhomat e Specializuara në Hagë vijon të mbetet në qendër të vëmendjes politike dhe publike. Kryeministri i Shqipërisë, Edi Rama në një dalje live në rrjetet e tij sociale ka reaguar lidhur me ecurinë e procesit, duke e cilësuar atë si një “farsë” dhe duke akuzuar gjykatën për shkelje të standardeve ligjore dhe të të drejtave të njeriut. Rama u shpreh se, pas përfundimit të fazës së dëshmive dhe hetimeve, shpreson që në fillim të vitit 2026 të jepet pafajësia për ish-presidentin e Kosovës, Hashim Thaçi dhe bashkëluftëtarët e tjerë, si dhe të mbyllet përfundimisht procesi gjyqësor.
“Shkeljet e standardeve dhe të të drejtave të njeriut dhe të gjitha normave të të gjitha sistemeve ligjore janë e vetmja normë që kanë shkaktuar këtë farsë. Ku ende pa u dënuar, një president i zgjedhur nga populli dhe qytetarë që i kanë shërbyer Kosovës, mbahen mbyllur. Tani që ka mbaruar parada e dëshmitarëve qesharake, si dhe kanë mbaruar edhe dëshmitë tejet serioze të dëshmitarëve mbrojtës, kanë mbaruar hetimet. Uroj që viti i ardhshëm të jetë perdja e mbylljes së këtij tetari absurd të kësaj gjykate dhe të jepet pafajësia për Hashim Thaçin. Njerëz që të vetmin faj kanë që u rebeluan ndaj regjimit dhe morën armë për të mbrojtur lirinë dhe dinjitetin e tyre njerëzor. Kjo është e vërteta dhe këtë të vërtetë nuk e tund dot askush, e jo më një çekiç absurd që ka lënë kokrrën e namit”, tha Rama./abcnews.al
