Të paktën nëntë persona janë vrarë në Senegal pas përleshjeve mes policisë dhe mbështetësve të liderit të opozitës Ousmane Sonko, pasi një gjykatë e dënoi atë me dy vjet burg, duke hedhur dyshime serioze mbi shanset e tij për të kandiduar për president vitin e ardhshëm.
Mediat e huaja shkruajnë se vdekjet ndodhën pasi protestat shpërthyen në pjesë të kryeqytetit Dakar dhe qytete të tjera.
Ka qenë ministri i Brendshëm Antoine Felix Abdoulaye Diome i cili përmes një deklarate për mediat ka konfirmuar dhe numrin e viktimave.
Nga ana tjetër zëdhënësi i qeverisë Abdou Karim Fofana tha se forcat e sigurisë e kishin situatën nën kontroll në kryeqytet.
Disa media sociale dhe platforma të mesazheve u kufizuan në Senegal të enjten vonë – një lëvizje “ka të ngjarë të ndikojë ndjeshëm në aftësinë e publikut për të komunikuar”, tha observatori i internetit NetBlocks.
Sonko, kundërshtari më i ashpër i Presidentit Macky Sall, mungonte kur vendimi u dha të enjten. Ai supozohej të ishte në shtëpinë e tij në Dakar, ku ishte bllokuar nga forcat e sigurisë pasi u ndalua në fundjavë.
Autostrada që të çonte në aeroport u ndërpre nga demonstruesit, sipas mediave lokale, ndërsa një tren udhëtarësh që lidh qytetin e ri të Diamniadio me kryeqytetin ndaloi shërbimin./abcnews.al
