Safet Gjici, presidenti i Kukësit, në një lidhje direkte në emisionin “Pressing” në ABC Neës, ka folur për shumë çështje që lidhen me klubin verilindor. Sigurisht gjykimi në përballjen e fundit në Laç nuk mund të anashkalohet.
“Gara për titull? Ju e dini që nuk dorëzohemi kollaj. Matematikisht jemi në lojë. Duhet t’i fitojmë të gjitha ndeshjet. Nuk dorëzohemi, do apo nuk do Kridens Meta të fitojë Kukësi”, tha Gjici fillimisht. “9 pikë nuk janë shumë, por as pak. Pas penalltisë që nuk na u dha, ekipi u fut në presion. Nuk dua t’i justifikoj, por e shkatërroi ndeshjen arbitrit.
Arbitrat duhet t’i mbajnë duart larg rezultateve. Nuk mund të ndërhyjnë ata me një copë bilbil dhe të shkatërrojnë investimin. Nuk është hera e para. Është arbitri i Laçit, si të jetë shefi i klubit të Laçit. Na e ka vështirësuar shumë. Ka ende pikë dhe do tentojmë të fitojmë ndeshjet tona”.
“Tirana ishte skuadra, që në fillim nuk ishte më e mira. Që kur u mor Egbo ndryshoi situata. Nuk është dramë e madhe të dalin kampion. Ne kemi bërë shumë gabime, u mundëm drejtpërdrejt. Gafat që kemi bërë mblidhen në fund dhe del ky rezultat. Përgjegjësia kryesore është e lojtarëve dhe pastaj edhe te stafi. Pastaj kanë ndikuar edhe këto gjërat e jashtme”.
“Distancimi nga klubi? Kur isha afër, thonin që bëja presion. Tani që jam larg, thuhet se nuk bëj presion. Tani jam kryebashkiak. E kam ndjekur ekipin, jam në kontakt gjithë kohën. Nuk kam qenë prezent këtë vit. Kanë ndikuar disa faktorë. Kemi luajtur çdo ndeshje jashtë. Nuk jam i kënaqur me disa nga lojtarët që janë marrë me bujë.
Kemi pasur rezultate të mira, por kemi bërë disa hapa fals në disa ndeshje që i kemi pasur të fituara. Ndoshta ka gabuar stafi, ndoshta lojtarët. Në fund numërohen pikët dhe ja ku jemi. Kishim një shans po të fitonim në Laç. Ndeshja direkte e ndante dhe shikohej kush ishte më i fortë. Ju e dini se ne me Tiranën kemi fituar dy herë dhe kemi humbur një herë. Po kur nuk të lë Kridens Meta, nuk kemi çfarë bëjmë”.
“Në Laç ju e dini që nuk luhet futboll, luhet kush shan më shumë. Edhe ne kemi fituar, por ndërhyrja e arbitrit te penallti ndryshonte çdo gjë. Nëse jepej penalltia, do ishte ndryshe. Do fitonim dhe e them me bindje. Pas atij rasti nisëm të binim, hymë në presion. Kishte tifozë dhe nuk është respektuar protokolli. Delegatët e kanë parë mirë. Nëse i kanë shënuar në procesverbal. Tifozët u futën ën fushë. Nëse nuk i kanë shënuar, është çështje tjetër. Nuk luhet në ato kushte. Arbitri ishte në favor të Laçit. E panë të gjithë”.
“Klubi u ka plotësuar kushtet. Kanë bërë fazë si asnjë klub tjetër. Çdo kusht ua kemi plotësuar. Morëm lojtarët më të mirë të kampionatit, por edhe të tjerë. I kënaqur do isha po të realizojmë objektivat. Futbolli nuk është matematikë dhe ka probleme rrugës. Mos të harrojmë që kemi luajtur jashtë dhe ka ndikuar. Prandaj morëm shumë lojtarë, që mos ta ndjejmë problem e fushës. Ka pasur gabime pak nga të gjitha. Gjithsesi nuk ka mbaruar asgjë, nuk dorëzohemi. Kemi ndeshje të forta ne dhe Tirana”. /abcnews.al
