Loading ...
Gjermania ka hedhur poshtë me vendosmëri pretendimin e nënpresidentit amerikan, JD Vance, se Bashkimi Evropian (BE) po ndërhyn në zgjedhjet parlamentare në Hungari, duke e akuzuar Washingtonin për përpjekje për të ndikuar te votuesit.
Sebastian Hille, zëvendëszëdhënës i kancelarit Friedrich Merz, tha se Gjermania e refuzon akuzën e bërë nga nënpresidenti amerikan Vance.
“Nënpresidenti amerikan vizitoi Hungarinë vetëm pak ditë para zgjedhjeve parlamentare. Dhe ky fakt në vetvete tregon ose flet vetë se kush po ndërhyn te kush”, tha Hille.
Komentet e tij erdhën disa orë pasi Vance përfundoi një vizitë të nivelit të lartë në Budapest, ku u takua me kryeministrin Viktor Orban dhe shprehu hapur mbështetjen për rizgjedhjen e tij.
Dje, gjatë një konference të përbashkët për media, Vance e lavdëroi Orbanin si “liderin më të thellë në Evropë në çështjen e energjisë, sigurisë energjetike dhe pavarësisë”, duke sugjeruar se politikat e tij mund të shërbejnë si model për kontinentin.
Vance gjithashtu kritikoi ashpër BE-në, duke e akuzuar Brukselin se po e ndëshkon Hungarinë për zgjedhjet e saj politike dhe po përpiqet të shtypë vullnetin e votuesve hungarezë.
Sipas nënpresidentit amerikan, burokratët e BE-së “kanë bërë gjithçka që munden për ta mbajtur poshtë popullin e Hungarisë”. Ai i përshkroi veprimet e BE-së si “një nga shembujt më të këqij të ndërhyrjes së huaj në zgjedhje” që kishte parë ndonjëherë, duke kritikuar veçanërisht Brukselin për presionin e pretenduar ndaj kompanive të rrjeteve sociale për të kontrolluar informacionin që u shfaqet votuesve hungarezë.
