Në Gjermani kanë nisur bisedimet eksploratore mes Unionit Kristiandemokrat dhe socialdemokratëve për formimin e një qeverie të re. Kancelarja Angela Merkel u shpreh optimiste për arritjen e një marrëveshje me Martin Shulc.
Kancelarja Angela Merkel shprehu optimizëm të dielën ndërsa filloi bisedimet me partinë e dytë më të madhe të Gjermanisë për formimin e një qeverie, duke thënë se ajo besonte se një marrëveshje mund të përpunohej. “Mendoj se kjo mund të bëhet. Ne do të punojmë shumë shpejt dhe shumë intensivisht”, u tha ajo gazetarëve ndërsa mbërriti në selinë e socialdemokratëve për takimin e parë në një javë të mbushur me bisedime eksploruese me partinë e qendrës së majtë.
“Unë jam duke hyrë në këto bisedime me optimizëm. Në të njëjtën kohë është e qartë për mua se do të kemi një punë të madhe para nesh gjatë ditëve të ardhshme, por ne jemi të gatshëm kryejmë atë dhe të marrim një rezultat të mirë”, shton kancelarja gjermane. Merkel po lufton për të formuar një qeveri më shumë se tre muaj pasi zgjedhjet e përgjithshme i dhanë asaj një fitore, por pa shumicën.
Java e takimeve midis CDU-së së Merkelit, aleatëve të saj bavarezë CSU dhe Social Demokratëve (SPD) do të shqyrtojë nëse të dyja palët kanë baza të mjaftueshme të përbashkëta për të filluar negociatat zyrtare të koalicionit drejt një qeverie të re deri në mars ose prill. Por bisedimet nuk janë pa gracka – duke përfshirë pyetjen e ndërlikuar se çfarë do të ndodhë me më shumë se një milion azilkërkuesit të cilët kanë ardhur në Gjermani që nga viti 2015. Aleanca bavareze e Merkelit në veçanti CSU po mbron një qëndrim më të ashpër mbi imigracionin – duke përfshirë kërkesat që SPD i konsideron të pakëndshme. Megjithatë Lideri i CSU Horst Seehofer është shprehur i gatshëm të punojë për të gjetur një marrëveshje me socialdemokratët që drejtohen nga Martin Shulc./abcnews.al
