Superliga rikthehet këtë fundjavë, dhe bashkë me të edhe shqetësimi për sigurinë. Drejtori i Sektorit të Garave në Federatë, Lysien Nurishmi, tregon për ABC News-in sesi do të jetë bashkëpunimi me policinë, si është gjendja në stadiume, dhe çfarë kërkohet nga gjykatat.
Në Federatë frika është rritur me afrimin e ndeshjeve. Superliga luan javën e dytë këtë fundjavë, dhe institucioni që drejton futbollin në vend, nuk mund të parashikojë si do të jetë bashkëpunimi me policinë. Gjithsesi, cilat janë detyrat e klubeve, dhe në çfarë gjendje është niveli i sigurisë nëpër stadiume? Drejtori i Sektorit të Garave, Lysien Nurishmi, flet për këto tema në intervistën për ABC News-in.
Lysien Nurishmi, drejtor i Sektorit të Garave në FSHF: “Policia e shtetit do të ketë një person brenda rrethimit të stadiumit, pra do të ketë një komunikim me zyrtarët e ndeshjëve, në ndeshjen e parë ka qenë një person kontakti, policia në momentin që shikon diçka ose merr një sinjal do të jetë sa më shumë aktive që të ndërhyë në momentin e duhur pa u agravuar situata. Policia gjithashtu duhet të jetë e pranishme në kontrollin e tifozëve në hyrjen e stadiumit të paktën tek ndeshjet e rëndësishme dhe delikate që vendosin fatin e një edicioni që të jenë brenda rrethimit.”
Gjithsesi, Ligji për Sportin nuk e thotë shprehimisht se Policia e Shtetit nuk duhet të hyjë në stadium, ndoshta duhet interpretim ndryshe.
“Vetë sekretari i përgjithshëm ka dërguar një shkresë policisë duke bërë një interpretim të ligjit dhe duke kërkuar që policia të jetë bashkëpunuese. Juristët që kanë punuar me këtë ligj e pranojnë që ka një ngërç por nuk është shumë i qartë i shprehur.”
Për identifikimin e fajtorëve për dhunën duhen kamera, a janë nëpër stadiume?
“Në stadiumin e Elbasanit dhe Shkodrës të cilët janë të pajisur me kamera dhe sigurisht në nivelet ndërkombëtare, pastaj kemi edhe stadiume të tjera që kanë kamera vetëm në hyrjen e tifozëve ku bëhet kontrolli i biletave. Sektori përkatësi i federatës i ka dërguar një shkresë klubeve që të gjejnë një zgjidhje me kompani private ose kompanitë e sigurimit që të vendosin kamerat e sigurisë. Është një proces i domosdoshëm por nuk është se mund të bëhet për 2 ditë ose për një javë.”
Për të identifikuar tifozët duhen edhe bileta të personalizuara, siç ndodh në ndeshjet e kombëtares.
“Të gjithë e dimë që në kampionatin shqiptar tifozët nuk është se pajisen me biletë një javë përpara. Ata shkojnë një orë përpara ndeshjes, pajisen me biletë dhe futen në stadium. Prandaj është interesi i klubit që ti kërkojë tifozëve që të kenë një abone vjetore siç ka bërë klubi i Tiranës, ose bileta nominative ose në momentin qe futen në stadium të kenë kartën e idnetitetit siç ka ndodhur dhe vjet kur policia e ka kërkuar.”
Problem më vete është ndëshkimi i fajtorëve, pasi deri tani ka pasur vetëm gjobitje, edhe kjo në disa raste.
“Për mendimin tim ligji duhej të ishte pak më i ashpër. Në rast se një person ka përsëritur një dënim ai nuk duhet të lejohej të futët në stadium, pra është ura lidhëse midis policisëm federatës dhe klubeve edhe gjykatave. Ne pretendojmë që të mos kemi më policinë brenda stadiumit, por duhet të kemi edhe një kuadër ligjor shumë të fortë.”
Në shtator nisin Kategoria e Parë dhe Kategoria e Dytë, ku dhunë ka pasur edhe në prani të Policisë së Shtetit.
“Në Tiranë është bërë një takim i Drejtorisë Rajonale të Tiranës me klubet që i përkasin qarkut të Tiransë, pra do të ishte mirë që në çdo qark policia e shtetit të kishte një komunikim të drejtpërdrejtë edhe me klubet. Unë si problem e shoh dhe në kategoritë e ulëta, kategorinë e parë dhe të dytë ku edhe mundësitë financiare janë edhe më të ulëta.”/abcnews.al
