Kryetarët e shteteve anëtare të Bashkimit Evropian pritet që të fillojnë punën për samitin në orën 15:00.
Gazetarja e ABC News në Bruksel, Erisa Zykaj, raportoi se kryetarët e shteteve priten të mbërrijnë në orën 13:00, ndërsa dy orë më vonë do të fillojë takimi në tryezën e rrumbullakët.
Pika e parë e diskutimit do të jetë Brexit. Çështja e zgjerimit sipas gazetares pritet të diskutohet disa orë më vonë, në kohën kur do të zhvillohet darka e punës.
“Në orën 19:30 deri në orën 21:30 që quhet darka e punës. Te darka e punës do të diskutohet çështja e zgjerimit dhe e Turqisë, inkursionet që ka pasur vitet e fundit në Siri. Lidhur me zgjerimin ato që burimet e samitit evropian kanë thënë për ABC News lidhen me qëndrimin e Francës që është i palëkundur. Pra nuk pritet që Macron të mund të ndryshojë qëndrimin e punës gjatë darkës së punës që do të ketë me kancelaren Merkel, por me të gjithë anëtarët e shteteve të tjera”, tha Zykaj.
Zykaj shtoi se qëndrimi i Francës nuk është i izoluar. Ajo ka mbështetjen e Holandës, Danimarkës që kërkon të ndahet RMV nga Shqipëria si edhe të Belgjikës dhe Spanjës./abcnews.al
