Loading ...
Shefja e Mbrojtjes e Francës, Catherine Vautrin ka deklaruar se lufta në vazhdim në Lindjen e Mesme “nuk është e jona”, duke theksuar fokusin e vendit në një strategji mbrojtëse dhe diplomatike.
“Objektivi, e përsëris, është vërtet të lehtësojmë rrugën diplomatike, prandaj edhe nocioni i mbrojtjes. Dhe sot, kjo luftë nuk është e jona. Është e rëndësishme ta theksojmë këtë”, tha për CNEWS ministrja e Forcave të Armatosura, Catherine Vautrin.
“Ne nuk jemi përfshirë në këtë luftë. Duhet të mbrohemi në mënyrë shumë konkrete dhe kjo është arsyeja pse strategjia e Francës është të shtojë kontaktet”, tha ajo. Vautrin shtoi se Franca së fundmi ka pritur një takim të organizuar nga shefi i saj i Shtabit të Mbrojtjes me homologë nga 35 vende, me qëllim “punën mbi një strategji mbrojtëse”.
Vautrin theksoi rëndësinë e një qasjeje diplomatike për të siguruar paqen dhe lirinë e lundrimit në rajon.
“Është e rëndësishme që të gjithë ta kuptojnë se kur flasim për Hormuzin në mëngjes, drekë dhe mbrëmje, kjo është sepse Hormuzi përbën 20 për qind të trafikut global. Pasojat prekin si vendet perëndimore, ashtu edhe Japoninë, Indinë. Shumë vende janë të prekura dhe është absolutisht thelbësore që të gjejmë një zgjidhje”, tha ajo.
Gati një muaj, SHBA-ja dhe Izraeli kanë kryer ofensivë ajrore ndaj Iranit, duke vrarë deri më tani mbi 1.340 persona, përfshirë edhe ish-liderin suprem Ali Khamenei.
Irani është kundërpërgjigjur me sulme me dronë dhe raketa ndaj Izraelit, si dhe Jordanisë, Irakut dhe vendeve të Gjirit që strehojnë kapacitete ushtarake amerikane, duke shkaktuar viktima dhe dëme në infrastrukturë si dhe duke ndikuar në tregjet globale dhe në aviacion.
Ngushtica e Hormuzit është mbyllur që nga fillimi i marsit. Rreth 20 milionë fuçi naftë kalojnë zakonisht nëpër të çdo ditë dhe ndërprerja e saj ka rritur kostot e transportit dhe çmimet globale të naftës./abcnews.al
