Festa e Pezës, e kthyer prej disa vitesh në një traditë, ka mbledhur sot qindra qytarë të Tiranës, që në vigjilje të 77-vjetorit të Konferencës së Pezës, jo vetëm kujtuan një nga ngjarjet më të mëdha e më të rëndësishme të popullit shqiptar, gjatë Luftës së Dytë Botërore, por edhe u argëtuan në aktivitetet e shumta festive të organizuara nga Bashkia e Tiranës. Festimeve iu bashkua edhe kryetari i Bashkisë së Tiranës, Erion Veliaj, i cili theksoi se Konferenca e Pezës është shembull shumë i mirë për shqiptarët për të punuar së bashku për progresin. Në pritje të ceremonisë zyrtare të përkujtimit të kësaj ngjarje historike, që përkon me datën 16 shtator, Veliaj ftoi qytetarët që t’i bashkohen festimeve që do të vijojnë deri në orët e vona të mbrëmjes së sotme. /ABC News Albania 24/7
